【我在劍橋留學的日子(十八)】

-終於,終於,劍橋大學!

26th February 2016 / by Rico Ho

myroad18-01

暑假過去,我坐上由香港飛往倫敦既飛機,搭上劍橋大學學生呢條「不歸路」。呢班飛機,我係心不甘,情不願咁上既。點解?事原係咁既。我不嬲都會坐開學之前嗰一日班機返英國,希望捉住假期既尾巴,Hea得一日得一日(有時仲會遲一,兩日先返去。)但我忘記左,入大學有一樣野叫O-Camp,即係成日喺新聞見到玩到好顛嗰啲。而喺英國,我地叫嗰啲做Fresher’s Week,會喺開學之前既一個星期搞。Fresher’s Week 除左比學生互相溝通溝通之外,仲係學校用黎做好多文件野既時間,所以學生係唔可以唔去Fresher’s Week 既。而如果我係開學前一日先到劍橋既我,當然會完全miss 左Fresher’s Week 啦。於是,學校就要我改機票,早幾日返英國,話唔可以miss Fresher’s Week,於是我就要洗多1500 蚊(Cathay Pacific 平機票改時間要加錢),坐9月尾既機返英國。

(你無睇錯,我無打錯,唔係8月尾,係9月尾。劍橋既開學日期係10月頭。)

但因為我太遲改機票,所以搞到得返啲奇怪時間,朝早9點40起飛。7點半Check-In,連機場船都無得坐,我要坐4點船去香港(澳門去香港係無5點船,得4點。),去到再坐的士去機場,所以我嗰一日(晚?)要3點幾起身。6點鐘去到機場,仲未有得Check-In,等左成個鐘,終於可以Check-In 入去坐低抖陣。點知,個地勤同我講我張機票無效,唔知點解。於是我又要走去票務到睇下點解。去到票務佢地都唔知點解,我俾佢地睇我封Confirmaion E-mail,佢地就話可能系統Short左,依家幫我改機票,但係,班機無哂位!OMG!於是佢地就話叫我坐下就班機,賠返1500蚊比我(咩情況?賠返我比既1500蚊比我?媽呀,我好亂呀!)最後,我係要喺機場坐到下就等足6, 7 個鐘先上到機。加埋喺英國Heathrow機場 去到Cambridge 既火車嗰一程,我呢個旅程足足用左超過24個鐘。

話說要由Loughborough 去 Cambridge,就要喺King’s Cross Train Station 王十字火車站坐火車。呢到就係Harry Potter 裹要講嗰個9又3/4月台,Harry 由麻瓜世界坐火車去魔法世界嗰個火車站。所以喺呢到有一個景點:半架手推車,一半穿左入牆。成日都好多遊客慕名而來,排大隊為同佢影一張相。而我喺英國讀左六年書,一次都無去影過。

IMG_1304
IMG_1310

九又四分三月台!

到左Cambridge,我就立即坐的士上去College。之前都講過啦,Churchill College 唔係喺市中心,由市中心行去Churchill 要行至少半個鐘,腳短啲既分分鐘要行成九個字,所以我成日覺得我地好似山區兒童,返學放學行個幾鐘。拎住行李,就無可能行成個鐘,於是基本上每次拎行李出Train Station 都要坐的士。

IMG_1320

火車站放既一塊牌。咩係Anglia Ruskin University?係位於劍橋既第二間大學,唔係劍橋大學。以於點解喺火車站會有個咁既牌?寫既點解唔係劍橋大學?無人知。

由的士上面望住劍橋既街道,街上明顯比上次黎多左好多「大學生」。可能因為上次係暑假,大部分大學生都走哂,而今次就岩岩開學,自然會多好多大學生。我望住呢啲學生,總覺得同我好唔似。佢地總俾我一種讀書人既感覺,一係就睇落好聰明,一係就睇落好勤力,而我總同佢地格格不入。都係因為咁,所以我喺入劍橋之前都捨棄左陪左我兩年既「金毛頭」,唔再MK,希望可以融入佢地。的士一路行,離市區愈來愈遠,樹愈來愈多,過左大約十五分鐘,我終於黎到Churchill College,我打後四年既屋企。

我黎過Churchill College 兩次,第一次係黎Open Day,第二次係黎Interview,頭兩次都係以考生既身份黎,以今次,我終於係以一個學生既身份。行入College嗰一刻,我終於明白咩係 College Pride,我以後就係Churchill College既人,我既成績,能力,所有野,就係代表緊Churchill College,就好似Harry Potter 裹面,Harry 做錯野葛來分多會比人扣分咁,我既表現都會影響Churchill 既表現。一諗到呢到,就自然緊張起黎,因為我諗到我要同呢到既學生比成績,「點鬥呀?!」,我覺得呢到好似個個都叻過我咁。

入到College長廊,左面就有一個Counter,我走埋去登記,佢就比左一堆文件我,有上網申請表,College Rule,仲有 kitchen rules,同埋一張好特別既紙。呢張紙係一張聲明書,上面寫話如果學生年尾考試拎唔到2:1 (即係60分,大約有一半多啲既學生拎到2:1 或以上。),College 就有權趕你出校。「OMG!認真?」我見到真係嚇一跳,之後笑唔出。我從來未聽過呢個Rules 既?睇黎以後既生活有排挨啦。

好彩我仲有一個星期先開始上堂,都仲未洗挨住。我拎住岩岩到手既房Key,拖住個喼喺College 周圍搵我間房:53C。雖然Churchill 唔係好大,但每間Building 都係一樣樣,所以要搵到我間房都唔易。好不容易比我搵到啦,一開門,OMG!間房超大,有獨立廁所,玄關,房既中間放左一張雙人床(點解係雙人床既?)右邊有一張書枱,一個衣櫃,其實佢大到放多張床都仲得。「正!果然無揀錯Churchill!」我舖好張床後,攤上床唔洗1 秒就訓著左。嗰陣係夜晚7點,呢日係我喺劍橋既第一日。

待續。。。