【我在劍橋留學的日子(二)】

-我的沈佳宜

8th November 2015 / by Rico Ho

photo-1444807016527-23eae0a4b246

每個男仔身邊都會有一個沈佳宜,而如果當初無遇到我既沈佳宜,我諗我唔會去英國讀書,更加唔會考到劍橋大學。我就叫佢做阿嵐啦。我地係喺演藝學院戲劇學校排一套話劇識既。當時我地得十五歲,大家都係懵懵懂懂。戲中我地要飾演一對兄妹,對手戲比較多,好快就熟落左。無論思考,性格,定係對事物既態度,我都覺得佢同我好似。佢係一個好聰明,自信十足(甚至有啲太多)既女仔。

 

喺嗰個無Whatsapp嘅年代,我地係由text message 開始嘅。開始既時候我地一晩會互傳數十個訊息,無幾耐就開始會晚晚傾電話。但講既都係啲無營養既野,就好似我今晚食左啲咩,佢今朝上堂訓著左呢啲。雖然好無聊,但我地都傾得好開心,佢嗰份自信中帶有少少稚氣既性格完全將我電倒。所謂「少年情懷總是詩」,我好快就中意左佢。但呢個時候,問題就出現左。

 
Screen-Shot-2015-11-08-at-18.42.57

圖片取自電影【那些年,我們一起追的女孩】

 

阿嵐係一個成績好好既學生,而我就係一個唔中意讀書,只中意做話劇既男仔。於是為左拉近我同佢距離,我開始認真讀書。(無錯,呢個情節同【那些年】好似,所以第一次睇呢本書既時候我感觸良多,就好似講緊自己咁。)唔係講笑,我認真起上黎連我自己都驚。半年之內,我既成績由不值一提進步到榜上有名,真正既名列前茅。我諗你地都會試過為某一件事好努力然後終於成功做到,個種感覺係十分良好,就好似得到全世界咁,而當時我既全世界就只有佢。但正當我同佢打得火熱之際,佢突然同我講,佢要去英國讀書,仲話要考劍橋大學(嘩!你哪來的自信?)九月就會離開澳門。

thoseyears

圖片取自電影【那些年,我們一起追的女孩】

 

「係唔係每個男仔同佢地既沈佳宜都唔會有結果嘅呢?」個陣時既我,同好多中學生一樣,人生到嗰一刻為止都無理想,無諗過大學去邊到讀書,無諗過第時做乜。阿嵐既决定令我開始思索,究竟我有咩理想?而自從佢决定左要去英國讀書之後,就變得好冷淡,好似唔想理我咁。而我自己,就默默咁萌心了一個諗頭,我要去英國讀書。但如果要去英國,我就要向難度挑戰,「我要入劍橋!」(嘩!我哪來的自信?)。或者我想考入劍橋既目的係為左阿嵐,又或者我只係覺得考入劍橋呢個夢想夠難,夠Challenging。就係咁樣,我既追夢(?)之旅就開始左。

待績。。。

  

 

 <<【我在劍橋留學的日子(一)】-從全班包尾盲中中走到劍橋畢業

 【我在劍橋留學的日子(三)】-世上最遠的距離>>