2012 年，充斥住各種末世預言。有人話2012年12月20日，就係世界既末日，呢日之後就無明天，無未來。身為半個科學家既我當然唔會相信呢件事啦，但對於我黎講，呢一年，係十分難熬既一年。
呢一年，因為對住我班天才同學們我無左自信；因為達成左自己既目標我無左動力；因為自己既問題分左手；因為好多原因，我開始有啲唔中意自己。記得做話劇既時候聽過一種病，叫「Show 後抑鬱症」，即係話做完一個演出忙完之後突然無野做嗰種空虛無力既感覺。我諗我應該患左「Goal 後抑鬱症」，就好似足球員拎左世界盃之後；大帝James喺NBA拎左第N個總冠軍之後；打機既時候升到最高Lv之後既感覺咁，興奮完之後，都會問一句：「之後呢？」呢個問題大到嚇親我，我居然唔知道要點答。呢一年，特別鬱悶。
我依然好中意科學呢一科，好中意嗰種求知慾被餵飽既感覺，但我開始想搵其他野做，想搵其他野去填滿自己既時間。
我選擇左去做Gym同打籃球。
揀做Gym既原因係因為Churchill個Gym 離宿舍好近，2分鐘路程，我可以夜晚11點幾衝去做半個鐘Gym，亂咁舉幾下啞鈴，跑下跑步機，做完返房沖個涼大覺訓。嗰期又好興操到鬼死咁大隻，唔打得都睇得嘛。嗰期邊個唔想變成張家輝？
而開始打籃球，就係因為Churchill 有個長期無人玩既籃球場，又係2分鐘路程，方便到唔方便。我得閒就會一支公，拎住個籃球，喺個空既籃球場，對住個比正常籃框矮少少，個網又爛左既籃框，一球一球咁，將悶氣，鬱悶都發泄出黎。我發現，喺Churchill College既籃球場上望既日落好靚好靚，係我見過最舒服既日落。個天紅紅紫紫，連啲雲都喺藍紫色既，微風吹過草地，望住天既光線連愈來愈暗，暗到成個天變哂深籃色，暗到我再望唔到個籃框，我就唯有停手，坐喺空無一人既籃班場上，成個圍住籃球場既草地都無人，好似成個世界得返我一個咁。呢種感覺，真係好舒服，好似發緊夢咁，一個美妙既夢。
一係唔玩，一玩就要認真玩。既然都用左時間喺到，點解唔認真啲玩？於是，本身瘦底既我就走去飲肥仔水 protein shake， 增磅，再差唔多每日都去舉下「拎」， 一下一下咁，舉出我二十年黎都未有過既「雞肉」。同一時間，我開始認真打起籃球，參加左Churchill College 既College Team。
College Team 唔係好多人，大約有10 個到。隊長係一個讀緊Year 4 Engineering既 韓國人，其他人都係鬼仔。因為其實唔係好多人，所以我呢啲新仔都可以入隊。當然，我從來未認真打過籃球，所以一開始上到場，都唔知道要做啲咩，只係識企喺出面行行企企，射下波，所以Year 2 呢一年，雖然我都有跟住Churchill College Team 打 College League 學院聯賽，但都係睇多過打，喺場外打氣，睇波。雖然係咁，但我都覺得好好玩，為左打到正選，我成日都一個人走去籃球場到練波，有時日日都去，連考試之前都去。最後當然入唔到正選啦，到Year 2 尾我都仲係一個汁波仔，但汁波仔都有汁波仔既樂趣呀！總有一日，我會入到正選既，應該！
至於成績？你估一個考試前都走去打波既人會唔會好好成績？一般般啦。唔太差，但唔係最好個班人。
我既Year 2，除左入左籃球隊，變左「大隻仔」之外，就好似空白左咁。好彩，喺劍橋既之後兩年都比Year 2 精彩得多。可能，呢個係直路之前既急彎掛？過唔到既，咪跌落山囉，過得到既，等緊你既會喺平坦光明既前路，我諗好彩既係我識喺苦中找點樂，如果唔係就應該跌左落山。
待續。。。