「初戀，都總係無疾而終既。」何況我根本未開始戀。F4 嗰一年我無野做就摺星星，睇 tbb 又摺，溫緊習又摺，連發吽豆都摺緊。摺下摺下就摺多過520粒，想話講句「520」都唔得。摺多左，就返唔到轉頭，於是我就摺左1314+520 粒，即係1834 粒星星。仲要粒柆都寫左野上去。痴左線。
嗰年既7月，阿嵐總於喺英國返左黎，我就膽粗粗打電話去佢屋企。
「喂。」
「喂，阿嵐？」
「嗯。」佢把聲好冷淡。
「妳返左黎啦？我有啲野想俾你呀。」
「哦。」
「呀我一陣拎俾你啦。係呢，去英國讀書要準備啲咩？我F5 畢業之後會去英國讀書！」我聲音變得好興奮。
「無咩特別。」
「哦，咁。。。我依家拎啲野俾你？」
「唔。。。我唔得閒。」（嘩，咁老土？）
「一陣啫，好快嫁。」
「我唔得閒。」
「哦。」
「咁我收線啦，bye bye。」
就係咁，我就俾佢收左線，沒收埋我呢一年既努力。
無圖無真相，我的1834粒星星。
最後我將嗰1834粒寫滿字既星星同嗰嗰裝住佢地既 Hello Kitty 梳妝櫃（無錯，啲星星多到要用個梳妝櫃裝。）拎左俾阿嵐既朋友，叫佢轉交俾阿嵐。就係咁，我就無再見過嗰啲星星啦。
如果呢件事俾蘋果知道，我諗佢會寫篇新聞，「毒男唔自量追女神，1834粒星星放係到鋪塵。」
於是，我既初戀就咁結束左。未開始就結束左。
可能你會問，既然你女神都唔理你，連兵都做唔到，咁點解你仲去英國呀？等我借用一下【那些年】嗰句：「我很喜歡你，我也很喜歡，當年那個喜歡你的我。」我發覺當一個人有目標，而每日為目標努力嗰種感覺，真係好好。我hea 過懶過，又努力過，但我中意既都係當年努力追阿嵐嗰個我。好純粹，好熱血。
所以F5 開始之後我變得更積極，無論係學業定其他活動。無左阿嵐呢個目標，我仲有另一個，「我要入劍橋。」為左填滿我既人生，除左本身已經用左我好多時間既演藝學院之外，我仲參加左學生會，做左岩岩成立一年既學生會既第二屆理事長。仲有做左學校話劇社社長。到左十二月，終於有一間英國出名既私立名校收左我，unconditional offer，即係話我畢唔到業都已經有書讀。
當年喺學生會我負責既一個活動，園遊會 BINGO
F5 開學之後我就無再諗起阿嵐。到左三月，我就同左第二個女仔拍拖。而我既中學生涯都好快就係忙碌中結束左（當時英文部既我可以F5畢業。）過完F5 呢一個暑假，我就要去英國讀書啦！心情就好似返返去細個就黎放完暑假咁，假又放到好悶，好想返學見下同學仔，但又唔想返學校讀書。我好興奮可以去英國讀書，但又唔捨得呢個我生活在十七年既澳門裹面既人同事。
就係咁樣，喺2009年9月，我就坐上左去英國既飛機（其實係去香港機場既船。），踏上我既劍橋之路。
我和送船的朋友的合照
嗰時既我深信，我同阿嵐既故事已經完左。。。
待績。。。
【我在劍橋留學的日子（五）】－Welcome to England! >>