【我在劍橋留學的日子（一）】
－從全班包尾盲中中走到劍橋畢業
6th November 2015 / by Rico Ho
我仲好記得畢業典禮嗰日，因為劍橋大學既傳統，我地一班畢業生要兩個兩個排好，兩百幾人組成一條長龍，烈日當空下著住套老西加畢業袍，由學院行去 Senate House 進行畢業典禮，路程足足有二十分鐘。嗰日係英國成年最熱既一日，有成三十度，我行到出哂汗，一路行一路諗，對上一次咁樣成班人排隊行好似已經係小學既事。
細個既我好唔中意背書，又好硬頸，話唔溫習就唔溫習，所以成日都會「祼考」，媽咪都無哂我符。一開始媽咪都會喺測驗之前坐係我隔離幫我溫習，但係佢有佢幫，我有我坐，根本都溫唔到啲咩。所以唔記得由幾時開始，佢就無再陪我溫習，可能要去陪細佬，或者只係覺得根本無用。如是者，我就好順利咁樣係我初小嗰三年裏面，年年都名列前茅，掉轉數上黎個隻。
諗返起個陣時既我，唔明點解要讀書，讀書好似只係為左滿足家長同老師。又或者好似啲大人咁講：「唔讀書大個搵唔到錢嫁！」。所以個時我以為讀書就係為左搵錢，究竟我係幾時開始中意左學習呢？
大隊一行人行經大學圖書館，陽光曬到我隻眼都掙唔開，我嘗試望向呢個四年黎陪我一齊奮鬥左無數個晚上嘅圖書館，陽光下圖書館比平時顯得更大更宏偉。我喺到諗：「 What a journey ! 我諗個時考包尾既我，點都無諗過會可以喺間咁有氣派咁宏偉既劍橋大學畢業。究竟我係點做到嫁？」
待續。。。