我讀既話哂係一間寄宿學校，點會無一啲懶喺促進Boarders們之間友誼既活動呢？而School House 既例牌野就係London 鴨仔團，又方便又快捷。二十幾三十個「中學雞」好似大鄉里出城咁，坐大巴去London玩。其實每次都係做同樣既野：去大英博物館，之後自由活動（思念家鄉食物既我地就梗係去China Town 飲茶啦），然之後就坐返巴士返學校，又或者每年都有一次會去睇London既音樂劇。其實就好似同老友相聚咁，做咩唔係重點，最緊要係可以一班人做，而呢啲London鴨仔團就係最好既活動，因為無得唔去，所以再宅既同學都要出現。
個次係我第一次去London市中心，（上次坐飛機喺Heathrow 都只係喺London外圍經過，而且我仲訓到死左）其實心情都幾興奮。我地坐既大旅遊巴同平時返大陸坐嗰啲差唔多，不過就新啲靚啲。我地要坐成兩個幾鐘既大巴到London Zone 5 既Edgware站再坐成個鐘地鐵去市中心，加加埋埋都成三個鐘車程。喺車上無乜野做就同佢地討論下AOE既戰術，成班宅男好認真咁諗點樣打得更好，依家諗返起都幾好笑。（In Case 你地唔知咩係AOE：AOE係喺十年前十分流行既一隻戰略遊戲，就好似StarCraft咁，Build你既城市同軍隊同人對打，唔同兵種有唔同既特性，仲有同盟之間既配合，係一隻好講戰略既遊戲。）仲有可以望下出面好靚既天空，英國既天空總係特別靚，雲特別低，天特別藍，呢個就係我之前幻想既「英國天空」，同英國生活，係呢到生活，其實好開心，比我想像既好得多。
英國既天空，真係特別靚。
唔知點解當有一個人開始訓覺，就好似傳染病咁成班開始眼訓。拔萃仔開始訓著左之後，無幾耐個個就訓著哂。我就聽住我個寶貝iPod，開左文青mode，一路諗下呢樣諗下嗰樣，幻想下讀大學既生活，聽聽下歌都訓著埋。（我好中意我部iPod Classic，係我F4嗰時用新年利是錢買既，點知有一次等火車既時候漏低左喺個月台到，真係傷心左好耐，以家仲要有錢都買唔返。）
訓醒既時候已經望到London既城市景，同Loughborough 既鄉村感覺差好遠，但同我心目中既大城市差得好遠，高樓大廈少之又少，街上人流又唔多，車就好多，可能呢啲就係歐洲式大城市。一落到去Edgware站，我就心諗：「唔係呀，個地鐵站咁舊既，啲燈光又暗，又污穢。同香港既無得比囉！」的而且確係無得比，London 既地鐵系統有成120 年歷史，係全世界最耐歷史既地鐵系統，所以「殘舊是常識吧！」。
英國地鐵，同香港既差好遠。
我地用既係一日任坐飛，因為咁樣係最平最抵玩既，自由活動既時候又可以比我地用。個程車我好留意啲「英國人」喺地鐵會做咩，原來佢地好中意睇書，好多人都會係車上面睇書睇報紙。時至今日，「低頭族」都唔係太多，好多人都仲會拎本小說喺車上面睇。（可能係因為London 既地鐵大部分地方電話都無Signal，上唔到網，打唔到電話。）但我覺得呢樣野又幾值得學習既。試想像下如果CTM 壞左我地用唔到電話（唔...唔出奇呀！），我地等車坐車既時候又會做啲咩？
免費入場既大英博物館，所以次次學校去London都會去。
千山萬水，終於黎到賊竇，呀唔係，係大英博物館！入面真係大到好誇張，要認真睇真係要睇成日。但我地呢啲對佢地所有（好多都係搶返黎既）珍藏品無乜興趣既小朋友咪走馬看花，係咁意行兩個圈就走返出去，根本唔記得睇過啲咩。之後成班男仔就坐係出面等到夠鐘集合（男仔都係唔中意去博物館，但偏偏我地每次落London 都係去大英博物館）集合完之後就係最期待既自由活動！因為可以去China Town 飲茶！好難想像一班男仔會為左可以去飲茶而興奮莫名，如果係澳門，可能屋企去飲茶我都未必會去添。但係英國讀中學，連去超市買零食都係最開心既娛樂，飲荼？仲洗問既！
飲完茶無幾耐我地就要集合坐車返學校。其實每次學校落London真係無乜野做，又唔係留好耐。去到讀大學個時落London已經唔係一件咩事，無野做又落去同球王同Kelvin 佢地（佢地全部都係Imperial College 呢間男大學讀書）食個飯再返去劍橋。但到依家我諗返起都會覺得好開心，或者有時候當所有野都變得輕易得到既時候，佢既意義就已經無左。落London係咁，飲荼係咁，做人都一樣。
待續。。。