對於香港，我由細到大都充滿憧憬同幻想，可能係由於我媽咪同一般家庭主婦一樣，都好中意睇TBB既劇，晚晚都睇TBB送飯。細個既我成日覺得香港係一個國際大城市，五光十色，璀璨奪目，所以由細到大我都好想去香港既大學讀書。一開始我想讀香港演藝學院，做一個演員。但我係入左澳門演藝學院讀話劇之後無幾耐就發現自己根本唔係做演員既料，所以依家只好乖乖做一個觀眾。然之後我就想去中大讀書，直至我開始諗去英國開始，就無左呢個「香港夢」，變左做「英國夢」。
點知黎到英國識既第一班同學居然會係香港人。其實我一直覺得澳門人同香港人無咩分別，因為語言一樣，文化一樣，睇既電視，雜誌都一樣。但我黎到呢到先發現，兩地既人係有少少唔同，相信係英國讀過書既人都絕對明白我講乜。例如，如果佢地講「要控制自己」，香港人會講「要撳住自己」，我地話話「要暗住自己」。又例如如果有人唔排隊，佢地會叫「打尖」，我地會講「尖隊」，仲有好幾個呢啲咁既例子。
最搞笑既係，好多香港人都唔知澳門既清況，我既好同學James，佢曾經問過我呢啲問題：「澳門人睇TVB嫁咩？」，「你地係唔係用人民幣嫁？」，「澳門人講廣東話嫁咩？」。聽到當堂嚇一跳，之後真係得啖笑。唔好誤會，James係個好 nice既人，佢只係對澳門呢個小城市乜都唔知咁解啫。就好似佢地以為新界既人個個都仲耕緊田咁。
有時我會專登過香港搵佢地食飯，估下邊個係James？
講起James，大家都應該睇過一篇由陶傑寫既「Come on James」。文中既男主角因為讀唔到大學而讀副學士而被女主角嫌棄，話同佢唔同層次。香港就係一個咁樣既社會，只有大約20%的中學生可以讀到大學，其他既就要讀副學士，ive, 「剪翅」等等呢啲課程，希望奇蹟可以發生銜接到讀大學。而入到大學對於學生黎講係幾咁重要睇下呢篇文就知，入唔到分分鐘連女朋友都無埋。而澳門呢，我敢打賭，有一半以上既澳門學生根本唔知咩係副學士，因為呢樣野根本唔洗諗，有差唔多九成中學畢業生可以升讀大學，另外嗰一成就係唔想讀大學，唔係無得讀大學。基本上，你想讀，就有得讀。
我一直覺得澳門學生唔夠香港學生有競爭力，所以我去到Loughborough之後就係代表緊澳門學生（因為成間中學得我一個澳門人），絕對唔可以跟唔上佢地既腳步。尤其是拔萃仔日日都好早起身做野，球王又係數學神人，代表學校去參加比賽，仲拎到全國頭十既驚人成績，而成日過黎我地房玩既音樂神童Kelvin又係Exam Machine，住Room2 既我，你話點會唔大壓力。所以黎到英國我成績開始進步既其中一個原因就係壓力，怕進度落後，怕跟唔上人。至於另一個Room2 住客James？佢都係一個神人，不過喺另一方面。
James 係一個永遠都會比到驚喜你既人。有驚，有喜。有一日我食完Tea返房既時候，一入房就見到James 拎住個風筒係到吹緊唔知咩。佢一見到我就撲過黎攬住我（Hehe？！），係咁話「對唔住呀Rico！對唔住呀Rico！」，「咩事呀？搞咩？」
「我倒左杯水落你部電腦到呀！」
好彩我部電影係IBM黎既，係Laptop界既Nokia，用坦克壓過佢都無事，所以最後佢用風筒吹返乾之後就完好無缺。如果唔係無左部電腦我真係會生不如死嫁。
留學二寶，公仔麵同電腦。
又有一晚，Prep Time 完（唔明請睇第七集－男生宿舍）James 就走左去沖涼，過左半個鐘，佢乜都無著只係圍住條毛巾沖返入黎（又Hehe？），講左句：「好暈呀！」就攤左係自己張床到，昏睡過去。我地一開先都唔知咩事，就無理到佢。點知到左十一點，舍監大人黎熄到我地間房既燈之後唔夠半分鐘，佢就跳左起身。
「嘩，岩岩差啲死。」James笑住咁講。
「下？」
「岩岩沖沖下涼突然覺得好暈，差啲係沖涼房暈低。於是我衫都無著，圍條毛巾就沖返黎，差啲上唔返黎暈係沖涼房呀！」佢都仲係笑笑口。
「你肯定係沖得太耐啦！傻仔！」球王係床上面講，佢都準備訓覺。
「咁舒服呀嘛。」佢一路著衫一路講，跟住開返枱燈。
「做咩呀你？」我問，都係床上準備訓覺。
「做功課。仲未做哂功課。」
就係咁，佢就開住盞枱燈做野做左個幾鐘，搞到我地個晩無覺好訓。
我覺得James係一個傳奇，係因為佢啲諗法總係出人意料既。例如有一次我唔記左拎開我個喼既鑰匙，佢居然可以用條唔知咩野整下整下幫我開返個喼。仲有，因為佢唔想咁早起身食早餐，但每日都會有人走入我地房開我地燈叫我地起身，於是佢就整左個裝置，可以係自己張床到拉一拉個裝置，就唔洗行去房門口就可以熄返盞燈，連落床都慳返。真係不得不寫個服字比佢。當然，被舍監大人見到之後個裝置就當然被佢拆左落黎啦！但都不得不佩服James 既創意。
待續。。。