係英國讀左一年中學，學到既除左知識之外，仲有既係自信心。中國人係教學上面信奉既激勵主義往往令到我地呢啲學生無哂自信。我仲記得好清楚當年中學既時候我既數學老師有一次叫我地班既人逐個放學去搵佢。我去到既時候佢就比左條數學題我做，然後問我識唔識。無溫書既我當然唔知佢寫左啲咩火星文上去，跟住佢就同我講：
「咁簡單既數都唔識，你唔會升到班嫁。如果唔識就努力啲啦。唔好成日掛住玩啦。」
我記得呢件事，係因為我聽完佢講之後我真係覺得自己好差，好無用。相信好多人都試過咁樣諗，覺得自己好無用，讀書讀極都唔識，根本唔會讀得上。但事實又係唔係咁呢？心理學上有樣野叫Self Fulfilling Prophecy 自我應驗預言，意思即係話人們總會有意無意地成為自己認為自己係點既人，簡單啲講，一個成日比人話數學差既人會有意無意咁唔學習數學，令到自己數學差。相反，一個成日比人認為係天才既人會比一般人更努力做野溫習，為左唔令其他人失望。所以中國人既呢一套教學方法，好容易令到小朋友對自己無自信，成日覺得自己唔得，最後就真係會唔得，然之後變得更無自信，簡直係惡性循環。
係英國，無論係做岩幾唔重要既事都會有人欣賞，有人鼓勵。老師會注重學生優秀既地方，加以鼓勵，所以學生們普遍比澳門學生有自信，更積極去學習。而我地呢啲由港澳地黎既學生本身既數學能力比佢地好，得到既讚賞同認同就更多，自信就好似澳門既樓價一樣，幾個月翻一翻。所以我既劍橋夢，由最初只係隨便講下，到Year12 就黎完既時候已經變成可以實現既目標。因此，我地幾個想報劍橋既男仔（有我，球王，拔萃仔同沙田友Kelvin）決定要喺劍橋Open Day既時候去睇清楚劍橋每一個學院，於是就請左三日假去劍橋黎個深度遊。
所謂劍橋大學，其實係由三十一個College學院組成。佢地所謂學院唔係咩科學院，醫學院。佢地叫個啲做Faculty／Department，而College 就係好似哈利波特裏面既既葛來分多或者史萊哲林咁樣，學生係嗰係住，有時會喺嗰到上堂，但主要上堂考試都係返去Faculty／Department做。同哈利波特一樣，唔同既學院有唔同既特色，例如有啲學院音樂好勁，有啲就好細，有啲就學術好勁。而我地呢班報考劍橋大學既迷途小羔羊，無分類帽幫我地揀College，唯有自己去睇清楚邊間College好啦。（順帶一題，收生係由College負責，所以唔同College有唔同收生規矩，準則，所以揀一間岩自己既College去報係十分重要嫁。）
Cambridge 火車站出面滿滿既單車
請左兩日假，由星期四到星期六行足四日，去唔同既 College 參觀，聽Talk，同劍橋既學生傾計，聽落去好似好多野做咁，但其實好好玩，尤其是因為我地一班人四個男仔一齊去，搞到我地好似去畢業旅行咁。坐左兩個幾鐘火車由Loughborough 黎到 Cambridge（要轉兩次車），佢比我既第一個感覺就係好大風，好多人。比起London，佢當然唔係話好多人，但比起Loughborough佢就真係好多。我地去Open Day 既時候係七月，所以都幾熱下，而且Cambridge 又幾曬下，所以由火車站拖住行李行成十五分鐘去旅館個條路都搞到我地出哂汗。我地Book既係Cheap Cheap既旅館，係住宅區一個連招牌都無，完全唔覺眼既屋仔，四個人一間房，無獨立廁所。個公用廁所仲好似係八十年代既咁，甩甩地色既綠色牆，生鏽既水管，同眨下眨下既黃燈，拍緊2046咁。無計啦，平呀嘛，Cambridge呢個旅遊城市，一間咁樣既房每人都要俾30 鎊，真係幾誇張。
我地住嗰到離市中心好遠，要行成二十分鐘，好彩行兩分鐘就有超級市場，仲有Pizza Hut 同戲院，所以第一晚我地就去左Pizza Hut 食飯，食完飯就返旅館休息，準備第二日既行程。最後我地就成晚係到玩Online Poker（免費比小學雞玩個啲），四個人入同一張枱到一齊夾份玩枱上面其他人，好鬼無聊。但依家諗返起，年輕既時候，無聊已經係一種快樂，真係開心。
第二日我地就出左去市中心，去參觀學院。我，球王同沙田友Kelvin 報左名去第一間College既Open Day，Christ College。拔萃仔就去另一間College。其實我一直都想讀Christ College，因為佢有一樣野叫EE Offer。咩係EE Offer？就係如果佢Interview完之後覺得你係勁既，想收你既，就會係一月出一個Offer：只要你係黎緊六月考既A Level 拎到2 個E 就會收你（一般至少要拎1個A＊，2個A），即係話收到呢個Offer既人基本上可以喺之後嗰半年都唔洗再溫習讀書，祼考埋個A level都無問題。無壓力咁讀半年書，諗起都覺得正。
第二張相入面既係宿舍，係咪好似監倉呢？
Christ College 出面睇好靚，好中古世紀既感覺（因為真係中古世紀既產物嘛），但入面睇就有啲殘舊（我知，佢有幾百年歷史，但唔代表你唔可以翻新下入面嫁嘛！）。一入去就有幾個接待人員（佢地叫呢啲人做 Porter）問你黎做咩，最主要唔想啲遊客亂入College。我地三個表明就係黎參加Open Day 之後，佢就指示我直入去跟住指示走。我地行左幾分鐘，經過幾棟新啲既建築物同一個Charles Darwin 達爾文（著名生物學家，喺Christ College 畢業既）既石像之後就黎到到門口。入面有好多年輕人（準學生），個個身上都掛住個名牌，三兩個一Group 咁傾緊計。雖然個氣氛好熱鬧，但都睇得出每個人都有啲緊張。見到佢地，我就係到諗，唔知呢班人裏面有幾多個最後會入到呢到讀書呢？我同佢地既能力又差幾遠呢？諗到呢到，我都不禁緊張起黎，就好似我要準備面試咁。我地去拎左個名牌之後就掛左係胸前，三條友就企左係到唔知做咩咁，有啲緊張。好彩等左無耐就要入去聽一個講座，講下Christ既收生要求，我地要點準備，同劍橋既生活係咩咁。
個講座既內容離不開講下收生要求係AS level 成績要考到90 幾分，要對學科有熱忱，要好聰明等等。我記得個收生Officer 講野好串，態度好高傲。我都明白既，當你每年都要拒絕一班其他學校都夢寐以求想收到既學生，當然會容易自我澎脹，但聽落去就好唔舒服。講座完左之後就有一班Christ 既學生帶我地參觀一下Christ既四周同宿舍房間。我地比分派到唔同既小組，由唔同既學生帶我地參觀。我地既組長係一個奇怪既人，好高好瘦既白人男仔，面上掛住一副燦爛既笑容，但有啲唔自然，好似係扮出黎咁，最奇怪既係佢戴住一副鮮黃色既星星形太陽眼鏡，令佢睇落成個傻仔咁。佢地講野好快好簡潔，呢個係劍橋學生既特點，因為諗野諗得好快，所以要跟到佢地既思想都唔係一件容易既事。
講返呢間College，參觀完之後我更加覺得我唔會報呢到。因為College 好細好舊，而且佢個宿舍細得可憐，好似個監倉咁，宿舍走廊又窄又矮，好有壓迫感。所以我嗰陣時已經係心裏面決定左唔會報Christ College。不過既然黎得，就完成埋個活動先走啦。
參觀完College，星星眼鏡哥就帶左我地去一個房到，話係 drinks and questions 時間，我地可以一邊飲野一邊同啲教授，學生或準學生傾下計。我不嬲都唔善於交際，尤其是成間房無一個人係我識既，但英國人最叻就係同啲三唔識七既人吹水，係火車到可以同隔離位嗰個傾天文地理，講到唔願落車，變左一個鐘既Best Friend 咁，所以所有人都好自然咁三五成群，把酒論Physics。個日既我唔知係因為覺得要同佢地打成一片定未食藥，居然好主動咁搵人傾計。我記得嗰個係一個蘇格蘭女仔，叫Sophie，我記得佢唔係因為對佢有意思，係因為我第一日返劍橋上堂就撞到佢，最後同佢做左四年同學。Sophie 既興趣係Biology 同Chemistry，我同佢講我中意Physics，仲開始講Quantum Mechanics 同Chemistry既關係，佢都好似對呢啲野好有興趣咁。傾傾下，我見到沙田友同球王入左黎我就去搵返佢地傾左陣，就離開左Christ College。
嗰日係我第一次同劍橋學生接觸，同埋同啲準學生傾計。嗰晚我成晚係到諗，我同呢班學生既距離有幾大呢？我有無可能可以入到呢間大學，成為佢地既一分子呢？我諗起個Talk 上面嗰個講者講左一啲Interview會問既問題，例如「太空中有無可能點火？如果得，又會係咩樣既？」於是嗰晚除左同佢地玩Online Poker之外，我仲上網搵左好多呢啲奇怪問題，嘗試去解答。或者我係想借住解答呢啲問題去話比自己聽我都有能力同佢地一樣考到劍橋掛。
St John's 既大門口，佢又真係幾靚既。
我心目中除左Christ之外仲有兩間College係有興趣既，第一間係St John’s，因為佢夠靚。第二間係Churchill，因為Churchill 既宿舍房係最靚既。第二日我就去左St John’s 既Open Day。St. John’s 的確係好靚，但唔知點解比我既感覺好Cool，好遠。我係St John’s 行黎行去，都想像唔到自己係呢到住會係點既感覺。St John’s Open Day 有一個環節係同你既系主任傾計，比如我報Natural Science，就會可以同佢地學院負責Natural Science 既Professor （佢地叫做DOS，Director of Study)傾計。呢個環節除左可以比學生問教授問題外，仲可以比學生知道同教授夾唔夾，話哂你要跟佢四年，唔夾既話好大獲嫁嘛。好彩有呢個環節，令我得知St John’s 既Natural Science DOS 係一個好串，好嚴厲既人。佢比我既感覺係佢既學生係唔容許做錯野既。跟佢做野好似會好辛苦咁，重要既係佢會係我地既Interviewer，我唔認為佢In 我我會入到劍橋。於是，我報St John’s 既念頭既係嗰日打消左。最後，就只係得返Churchill。
Churchill 既感覺同其他College好唔同，好舒服。
行程既第三日，都係最後嗰日，我地四個就晨早流流起身去坐巴士去Churchill。因為Churchill係Cambridge 市中心既北方，而我地既酒店係南方，於是我地要坐嗰架「Uni 4」 巴士坐四個字先會去到。Churchill比我既感覺好好，因為佢係一間新既學院(得五十幾年歷史），我覺得都幾靚，有一種Warm既感覺。Churchill 係喺一個草地上面建成既，所以四周都係草地，一眼望過去都係綠色既，加上微風吹住，直情都成個人訓落去。
到左Churchill，一開始都係一啲Drinking and chilling section，又係嗰啲社交活動。不過今次我地四個男仔都一齊去，所以我地就一齊Hea左陣，就入左去聽talk 。個talk 既內容其實都係嗰啲野，同我之前去聽既差唔多，但講Talk嗰個男人感覺上Friendly好多，聽落去更加舒服。我聽到有啲無聊，就開始周圍望。坐係到既都係想考劍橋既學生，我就開始幻想第時上堂既情況，可以同一班天才齊讀書，一齊上堂，諗起都覺得興奮。我留意到遠處下方既一個背影，有一種好熟悉既感覺，但因為佢背住我，所以我睇唔到佢正面，正當我猶豫緊佢係邊個既時候，講座就完左，我地就要跟住啲Student helper 去參觀宿舍房。
Churchill因為離市區好遠，所以比一般College大。唔知係咪因為咁，所以啲房都特別大。最好既係好多房都有獨立廁所，唔洗同其他人Share 廁所。而我最愛既就係佢既大理石窗台，可以坐係個窗台到望住出面既草地，「做功課（OMG！）」，真係人生一大樂事。參觀完宿舍，當我地一班人落緊宿舍樓梯既時候，咁岩另一班人就上去參觀，迎面而來既嗰一班人，其中一個竟然係阿嵐（唔知邊個係阿嵐既可以睇返第二，三集），原來岩岩坐係下面嗰個好熟口面既人係阿嵐。「＠＃＄＠％！＠！＄！！...」我反應唔黎，同佢對望左一眼，佢用一個驚訝同奇怪既眼神望住我。其實過左咁耐，我已經無再對佢有咩思念既感覺，何況我嗰時係有女友既，但無啦啦係個唔expect 見到佢既地方撞到佢，仲要面對面撞到正一正，真係學阿姐話齋「嚇死人咩？個心離一離呀！」。我唯有即刻擰轉面扮見佢唔到啦。
返去Loughborough個程車上，我望住出面既景色，發現劍橋離我依家既距離，已經唔係天同地之間咁遠。我發覺我地既距離，只有兩個鐘車程。或者，或者有一日，我既夢真係可以實現到。