【我在劍橋留學的日子（十三）】
－倫敦帝國學院
14th January 2016 / by Rico Ho
開心既時間過得特別快，好快就已經喺英國讀左一年中學，話咁快就要準備報大學啦。放完 Year12 既暑假之後就要開行Turbo 報大學。喺英國報大學唔同喺澳門要一間一間報，而係要經一個叫UCAS既機構一次過報哂，最多可以一次過報五間大學，每間大學一個學科，只需要填一份申請表格，寫一份 personal statement 自我介紹，喺Year 13 嗰年既1月之前就要交申請表。而想報報劍橋或牛津大學既學生更要喺10月中之前交表格，仲要另外填多一份personal statement ，同專用申請表，所以九月中一開學就要忙住搞申請大學既野。（仲有一樣好得意既野，牛津同劍橋好似有世仇咁，兩間只能報一間。所謂一山不能藏二虎，唔通一國都係不能藏二名校？）我地呢啲Year 13 都由上年既玩下玩下變成認真mode。考大學，不成功，便成仁。
由於報大學既時候我地交既personal statement 超級重要，我地既personal statement 要比四至五個老師，甚至校長睇過一次，經過無數次既修改，所以我地要係開學後第一個星期之內嘔到第一份草稿俾佢地睇。當我寫好我份personal statement 既第一份草稿之後，再讀一次自己寫既野，我先發現原來我係可以咁假嫁。第一段我就寫：
Being brought up in Macau, I understand the frustration of people when their desire is never satisfy. When I was young, I tried to break all my toys and see what it is made of. I believe my desire for knowledge and answer starts when I was still a little boy, but that desire was never satisfy, I was always unhappy with” because it’s how it works”. Then I discovered science, and I find myself deeply attracted to it since then.
內容大概係講我細細個就好中意問點解，會拆哂屋企啲玩具出黎睇（我覺得係因為我手㾗，唔係因為我好奇。）又話我由細到大都好中意科學，所以先會報讀科學。總之成篇野就寫到我係為科學而生，細個寫我的志願就係要成為「霍金」。
一升到上Year 13，我地就變成學校裹面最高Form個班，當我地打上一條專屬Year 13 既紅色呔，我地就變成左學校入面既貴族，成為優越既一群人。喺英國一個咁自由既國家，原來都有階級制，仲要十分嚴重添。例如我地學校入面既草地，只有老師同Year 13 既行上去，低Form 既係唔可以行上去既。仲有，我地去Canteen食飯既時候同老師一樣，係唔洗排隊，直接就可以行入去，完全無視左後面排緊隊既?仔，有時我行入去既時候望到啲低Form 既望住我，我都覺得唔好意思。同埋，我地任何一個Year 13 都係風紀，如果覺得你唔尊重我地，又或者做錯啲咩事，隨時可以記你過，所以啲小朋友都唔敢撩我地，驚比我地記佢過。原來，權力既感覺係咁既。
Year13 既學生打既紅呔，就係權力既證明 photo taken from Loughborough Grammar School's Official Website
「能力愈大，責任愈大。」我地呢班「貴族」，每個都要幫學校做野，例如有時我地要喺小息既時候喺小賣部值班，控制住班?仔。又或者要喺Canteen 出面睇住嗰啲排隊入去食Lunch既?仔，等佢地唔好搞事，總之要做既野就五花百門，但都不外乎係管住班?仔，所以其實都好輕鬆。
就係咁樣，我既 Year 13 生活頭兩個月就過左啦。喺十一月頭，我就收到劍橋大學寄俾我既第一封信，叫我去Interview 面試，面試日子定左喺12月3號。其實我都預左有得面試，因為所有師兄老師都話只要你係學校成績好，就實會有得面試，事實上，大部分報左劍橋既香港同學都有得面試。但始終收到第一封由劍橋寄黎既信，真係超級興奮。信上面除左寫左面試日期之外仲有寫面試考官既名，我即刻Google左佢地，一個叫做Sally Boss，係研究無機化學既專家，另一個叫Mark Miller，係量子化學既專家。聰明既我當然就即刻睇下佢地既研究論文，諗住從中估下佢Interview 會問我咩問題啦。但年輕人我太年輕了，我又點會睇得明佢地既研究報告寫緊咩呢。
既然無辦法從佢地身上估到問題係咩，我决定喺圖書館借好多關於劍橋面試既奇怪問題既書（無錯，有啲書係專俾我地呢啲報劍橋既迷途小羔羊睇既，寫左好多Interview既奇怪問題。）仲有參加左兩個學校搞既面試雞精班，其實呢間學校真係有好多方法幫我地呢啲準備讀大學既Year 13，除左Personal Statement 跟得好足之外，仲有一啲專比考劍橋／牛津大學既同學上既面試班，負責教既係我既最愛s：Dr Green 同 Dr Luke。Dr Luke 係喺劍橋數學系畢業既（傳聞佢勁到係劍橋到可以拎到獎學金讀書，真係不得了。），佢負責既係一啲大學程度既數學，希望我地喺面試或者入學試既時候識得答嗰啲難到抽筋既數學難題。而Dr Green 負責既係面試技巧同一啲叫Feymann Question 既問題，實行黎個大包圍，全面幫我地準備好面試。我其實真係好感激佢地，如果無佢地既話，我都未必會考到劍橋。更重要既係，佢地教識我點樣用一個科學家既角度去思考，去欣賞科學。
其實喺12月3日黎之前，我仲有一個喺Imperial College 倫敦帝國學院既Interview，大家可能未聽過呢間大學，呢間大學就好似美國既 MIT咁，只有理科讀，都係全球排名頭十，都係好好既大學黎。於是我就當呢個Interview 係我劍橋Interview既預演，始終要喺啲教授面前講野都真係會緊張，真係要演習下。
Imperial College 既正門。
12月最後一個星期六既大清早，我著住西裝，一個人坐火車由Loughborough 落去倫敦，再坐地鐵去Imperial College 準備面試。喺地鐵既時候我望住同車既其他人，我開始喺到幻想喺倫敦讀書既生活，可能會成日要迫地鐵，朝早趕返學。喺澳門長大既我從未住過大城市，其實一直都好想試下，所以愈諗愈興奮，我好期待大學自由自在既生活，唔洗俾舍監大人迫我地十一點前訓覺，食完飯既兩個鐘唔洗溫習，可以唔喺宿舍過夜，可以去朋友到玩。就係呢一片歡天喜地既期待中我黎到左Imperial College，一間男大學。話佢係男大學，唔係因為佢只係收男仔，係因為佢只有理科，所以男女學生比例好誇張，9比1，9個男仔對1個女仔。
London既地鐵，有時都好迫下。
面試之前一班 Student Helper 帶我地周圍參觀學校，介紹下佢地學校，講下點解我地要黎讀書。有一樣野我好在意，佢地喺咁話UCL （另一間倫敦既大學，都係全校知名既大學。）同佢地無得比，叫我地唔好入UCL。我開始懷疑，究竟呢個係面試日，定係假面試，真Open Day 希望鼓勵我地入黎讀？參觀完之後我地就被帶到一間房坐低等叫名上去Interview，間房入面有啲點心食同野飲，所以我地幾個準備面試既學生就坐左喺一張大圓枱到，開始講起自己，原來大部分人都有報劍橋／牛津，Imperial College只係後備既選擇，我嗰時就明白左點解呢個面試日好似Open Day 咁係到Sell 緊呢間學校，原來佢叫黎面試既都係成績好，佢想收既學生，所以今日佢地既目的係想我地中意呢間學校，之後黎讀（如果考唔到劍橋／牛津）。
等左幾個字，終於到我Interview啦。我入到間房，見到兩個大約四十歲既男人坐左喺間房入面，一面微笑。間房無咩特別，應該係佢地其中一個既辦公室，有幾張矮凳，一個茶几同一張辦工枱，仲有一塊大白板。我地握過手，面試就正式開始。一開始佢問左我幾條個人問題，例如點解中意讀科學，會唔會唔慣黎倫敦住。之後就開始問一啲好學術既問題，主要都係關於化學既。佢叫我喺白板到解釋個答案，呢個時候我就開始無名地緊張起黎，跟住我個腦突然一片空白，空白到連佢問緊咩我都唔記得左，所以我就只好喺白板到亂咁寫左啲野，講左啲狗屁不通既野。佢地好似完全聽唔明我講咩咁。當然啦，連我自己都唔知自己講緊咩。答得差令到我更加緊張，於是之後既情況真係只可以用「災難」黎形容，最後面試完畢，我出到房第一樣野諗既係：「Imperial 唔得，仲有其他既，唔洗咁擔心。」
事實係，由面試完左到回程既時候我都好擔心，以我呢個表現根本無可能會考到劍橋，「我覺得自己係零。」唯有返到去再努力一啲，準備得再充足啲，希望到時表現會更好啦。
結果，喺Imperial College 面完試之後既第二日，我就收到佢地既Email，俾左個「Conditional Offer 有條件取錄」我，只要我A－LEVEL 拎到3條A就會收我。結論係，唔係我Interview得好，而係佢地既Interview只係做樣，名為Interview，實際係Open Day。不過咁樣都好，至少我已經拎到一間學校既 Offer，即使我考唔到劍橋都有書讀。
距離12月3日面試既大日子，仲有一個星期。。。
待續。。。
【我在劍橋留學的日子（十四）】－最後一關：劍橋大學面試日 ＞＞