「時光是小偷，偷走了我們的青春，留下的只有回憶。」由决定要考入劍橋開始，我就踏上左呢條「英國不歸路」。依家諗返，嗰陣時既我稚氣十足，未跌過，所以可以為自己既夢想努力去追，好純粹，好簡單，青瀝得令依家既我妒忌。四年來，目標只要一個：考入劍橋。過左四年，我由一個普通澳門中學生走到2011年12月第一個星期，劍橋大學既面試日前既一個星期。
經過Imperial College Interview既失敗，我明白到面試前除左要準備好我既頭腦，仲要控制好我既情緒。「怯，我就輸一世。」我只有一次機會，一次。於是我除左前所未有咁努力準備我既Interview，仲要不斷話俾自己知：「我可以嫁！我可以嫁！」進入最後階段，要準備既已經唔多，經過幾個月既準備，我已經睇左大部分大學一年級既物理同化學書，上網既Online Lecture from MIT 都睇哂，量子力學 Quantum Mechanics，相對論 Relativity ，有機／無機化學 Inorganic/Organic Chemistry，依家諗返，嗰陣時既我，識既野比讀大一時候既我仲多。但其實準備咁多野，對於Interview既作用唔係話好大，因為好多考劍橋Natural Science系既考生同我一樣讀咁多，甚至有好多都係由細就讀到大，我無咩特別。我都聽好多例子係連劍橋教授個仔由細培養到大都考唔到劍橋，我呢啲半途出家既由點同佢地爭？但到左最後一個星期，我無時間去緊張。
我總共要進行兩個Interview，第一個既時間係早上9點。所以我無可能Interview嗰日先坐火車去劍橋，因為如果係咁既話我可能要坐早上5點既火車，去到都無哂精神。所以我就係劍橋訂左間旅館（上次Open Day 嗰間，詳情可以睇返第十二集。），早一晚去Cambridge。由旅館去Churchill College 只需坐幾個字巴士，所以我可以有多啲睡眠時間，精神好啲。
沙田友既Interview 喺我既前一日，所以我地Book 埋同一間房，好似平啲。其實Interview之前嗰晚係宿舍既旅行日，成班會一齊去London 睇「The Lion King」音樂劇，我都好想去睇，但為左Interview，無得睇都無辦法。當晚我去到Cambridge，搵到沙田友問佢拎房間鎖鑰，之後我就坐巴士返旅館。金黃色既光線從空無一雲既天空照入巴士，紫色同紅色交錯既黃昏同空空既馬路異常咁合襯，呢個景象靚到好似畫咁，同我忐忑不安既心情形成好大既對比。當太陽再升起既時候，我就要為呢四年既努力作一個總結。經過四年既努力，終於到左最後一關，最後一戰。
呢個唔係劍橋既天空，係喺巴黎既天空，但同個日我望到既差唔多（無PS過。）
嗰晚我好早就訓左，訓得異常咁好，一訓就訓到第二朝早上。我拎住我帶黎既書同筆記，坐上Uni4 巴士，前往Churchill College。我喺車上作最後複習，但我睇極都唔入腦，緊張到咩都諗唔到。去到Churchill College，我去到College Bar出面報到，然後就上左二樓既Waiting Room 等叫名。Waiting Room 入面放左幾排凳，同一張枱，上面有啲野食同有啲水飲，但我緊張到根本唔識肚餓，所以就呆呆咁坐左喺到。可能時間太早，只有兩，三個學生喺房入面等緊。嗰幾個學生都係中國人樣，身邊都有爸爸或媽媽陪住。過左無幾耐，有一個男仔入左黎，佢係Student Helper 呢到既學生，黎幫手帶人去Interview既。「Chon Pan Ho！」「Yes！」我就跟左佢出去，去我既第一個Interview。
第一個Interview喺College裹面一個好遠既地方，要行成十分鐘成去到。路上嗰個男仔同我傾計，我發現原來佢都係黎自德成，呀唔係，黎自Loughborough，佢係讀Loughborough College 既。佢都好surprised 我又係黎自Loughborough，因為我地嗰個「Town仔」 真係細到無朋友。佢同我講，叫我唔好緊張，輕鬆啲就得。到左Interview既地方，無人喺到。佢話我係第一個，所以可能要係到等一陣等Interviewer 黎。佢 wish me luck 之後就走左，剩低我一個係呢個玻璃屋出面等，屋入面有一張枱幾張凳，同一塊白板，好簡潔，好似我既心情咁，空白。過左五分鐘，一個金髮女人 Sally拎住杯咖啡行到黎，佢同我講唔好意思，遲左，然後叫我喺出面等一陣，等佢準備好就叫我入黎。
呢五分鐘係我人生中最重要既五分鐘，我知道自己既表現如果好似上次咁差就一定唔會入到劍橋，於是我已經一早Plan 好，係Interview前要好似之前喺演藝演出既時候咁深呼吸，做熱身運動。我真係喺門前面拉筋，做放鬆運動。好彩呢到無其他人喺到，如果唔係見到我喺到做埋啲咁既野會以為我緊張到痴左線。拉拉下筋我真係放鬆左好多，心情平靜得令自已都驚訝。「Come in when you are ready, Rico!」
一坐低，佢就開始問我化學問題，第一個問題就係我面前杯水有幾多個水粒子。完全唔會有廢up 時間，問你嗰啲點解要黎Cambridge，點解我地要收你嗰啲，Very Good。我中意。佢一連問左我幾個問題，都係比較簡單既問題，然後叫我畫粒H2O出黎，我照做之後佢望左一望，問我：「Do you really think that’s how it looks? 」我比佢既問題嚇到傻左，望左一望，發現自己將啲H 同O 分開左，即刻講：「Wait, no. That looks a bit weird. I guess I should join the two together.」佢微笑左一下，好似好滿意咁。之後就黎到最難嗰一題，佢叫我將 F－F，O－O，N－N，C－C，H－H，Cl－Cl，H－Cl 等等總共十幾個Bond 由強至弱排出黎。呢題其實難度幾大，因為佢唔只有C－C 呢啲Bond，仲有H－Cl 呢啲奇怪既Bond。最後我花左差唔多五分鐘，同埋加埋Sally 比我既提示先至完成到個答案。我見到問題紙上面既下一題，係我有睇過既一個Concept，點知答完呢題之後Sally就話夠鐘，Interview 完。我心諗，如果佢問我嗰一題我應該都會識答嫁，可惜。
第一個Interview完左，我開始放鬆左好多，都無我想像中咁難呀，所有問題我都識答。完左第一個Interview 我就要即刻趕去下一個Interview，行去既途中我就記起Dr Green 講既一件事。佢話如果你覺得Interview啲問題簡單，有可能係因為Interviewer 覺得你未到程度，所以愈問愈簡單，唔係一件好事。反而如果你覺得佢問得愈來愈難，難到答唔到，即係佢覺得你可能夠勁，可以比啲好難既問題Challenge你，係一件好事。唔通我岩岩其實In 得好差？
第二個Interview喺一間宿舍房入面，呢間好明顯係教授既房，因為間房好大，有廳有梳化，入面坐左一個光頭既男人 Mark，睇落同Sally 差唔多大，三十歲左右，有一副Mr Haigh既招牌Evil Smile （詳細請睇第八集）。另外仲有一個睇落老啲既女人，但成個Interview佢都無出過聲，只係坐係到聽住我做問題。第二個Interview 我就淡定好多，無再犯岩岩嗰啲低級錯誤。成個Interview 既問題我都識答，直到最尾一題，佢問我點樣可以令Compound A 化合物A同自己React 而唔同Compound B React。我講左好多關於Solvent 溶液同Compound 既關係，點樣可以玩啲Solvent令到呢件事發生。Mark 笑左一笑，同我講：「The answer can be very simple, you just add more water! 」嗰刻我突然覺得自己係一個白痴，咁簡單都諗唔到。
完哂兩個Interview，我成個人鬆哂，唔知你地有無試過，完左考試之後好想大嗌，心情激動。從Sally 同Mark 面上滿意既笑容，我估我應該In 得唔錯，至少仲有機會收到劍橋既Offer。我大步行返Waiting Room 拎返自己既野。返到去，我望到一個準備Interview既人，佢露出緊張既表情，佢望一望我，我微笑，執好野就離開左間房，離開左Churchill College，坐上Uni 4 巴士返旅館。
坐喺同一架巴士上面，琴晚我仲係一個為面試緊張到連美麗既夕陽都無心情睇既考生，今日我已經面完試，一身鬆哂，個天卻只陰陰沈沈，變返正常既英國天空，無半滴陽光。我同自已講，即使考唔到劍橋，我喺呢四年既努力都唔係白費既，至少我認識左一班好好既朋友，過左我人生最快樂既兩年，同最重要既係，曾經為我既夢想努力過，奮鬥過，咁就已經夠啦。
待續。。。