如果當初我無喺電視上面見到啲哥哥姐姐做戲，我就唔會咁想做演員。如果當初我唔想做演員，我就唔會入左演藝學院。如果當初無入到演藝學院，我就唔會識到阿嵐。如果當初無識到阿嵐，我就唔會諗去英國讀書。如果當初無發奮讀書，我就唔會夠膽話要考入劍橋。如果當初我無入到呢間中學，我唔會為考入劍橋準備得咁好。如果當初學校無一班咁好既同學，我唔會努力考好AS Exam。如果當初劍橋面試前無Imperial 既面試，我唔會識調整我面試時既心情。太多如果，結果好似整定咁。只要其中一個如果無發生到，都唔會有今日既我。2011年1月9日，我坐在喺自己澳門間房入面，準備打比拔萃仔。我緊張到講唔到野，心裹面一片空白，每個呼吸都好重。因為黎緊要打既電話，會影響我日後既四年，或者，係一世。

12月頭完左劍橋既面試之後無幾耐學校就放聖誕假，我就返左澳門。呢個聖誕同其他聖誕節無咩唔同，除左我既心情之外。因為1月頭劍橋嗰邊就會有結果，然後就會寄封信去宿舍，話比你聽結果係點。收唔收你，就係睇呢封信。有人話，其實連信都唔洗開，望一望封信就知佢收唔收你。因為如果嗰封信係取錄信，封信會厚好多，因為裹面除左一張紙話你知結果，仲有一大堆表格要你填同交返去。相反，如果只係寫封寫話你知 “We are sorry to informed you that your application is unsuccessful…” 咁就真係得一張紙。

希望我封信夠厚。

真係唔知點解，咁重要既日子我居然會係澳門，唔係英國。因為我不嬲放假都會早走遲返，提早兩日返澳門，遲兩日返英國，於是我班同學每次都會比我早返到去，而今次拔萃仔就係第一個返到去既，於是「拆信定生死」呢個任務就交左比佢。1月9日佢就返到去，我就同佢傾好左會打過去叫佢幫我開封信，因為我真係等唔切自己返去拆信。於是，我就喺房到等，等到約定既時間就打過去。

雙親們都知道我一陣就會知道結果，所以媽咪就每隔幾個字入黎問我：「打左電話未呀。」明明就未夠鐘。嗲哋就係出面睇電視，但好明顯佢都唔係真係睇緊，只係搵啲野做。其實一開始既時候我話要去英國讀書，佢地根本就無諗過我真係有可能入到劍橋。但我去到英國之後，唔知幾時開始，佢地都慢慢相信，呢件事其實唔係一開始諗咁天荒夜談，而係一件確實有可能發生既事。所以佢地都好緊張，希望我真係可以實現到我既「劍橋夢」。

到左約定既時間。

我用緊張到冷冰冰既手拎起電話，我諗都無諗過打比拔萃仔可以緊張成咁，仲緊張個細個第一次打比女仔。「嘟嘟。。。嘟嘟。。。嘟嘟。。。」

無人聽？

「喂？」拔萃仔把聲好攰，因為佢岩岩落機再坐左兩個幾鐘火車。

「喂。Rico 呀。你有無幫我睇有無信呀？」我完全唔知我係咩語氣，我緊張到唔識講野。

「哦，岩岩返到房，你等一陣，我衣家落去幫你睇下。」

所有寄去宿舍既信都會放喺樓下既Games Room 出面俾我地自己拎，所以拔萃仔就要落樓下幫我睇。

「。。。。。。」電話到傳黎開門聲同腳步聲。呢半分鐘就好似一個鐘咁漫長，呢個世界就好似靜止左咁。

「嘩，Okay 呀！你封信好厚呀！應該收左你！」拔萃仔興奮咁講。

「你開黎睇下先？」我個腦轉唔到，完全唔敢呼吸，生怕一呼吸就會吹走呢個脆弱既事實咁。

「等陣。。。」拔萃仔拆開左封信「We are delighted to tell you that we are making you a conditional offer，係呀，收左你啦！」