【我在劍橋留學的日子（十六）】
－一百個唔想溫習既理由
4th February 2016 / by Rico Ho
我諗每個學生都會有唔想溫習既理由，例如係：唔知課書講乜，唔中意個阿Sir，唔中意背書，唔中意用腦，張床既引力太大，太涷，太熱，乜野理由都好，但如果要我諗一百個唔想溫習既理由，我都唔會諗到呢一個：考到劍橋。但事實係，當我返到英國宿舍，親手拎住嗰封黎自劍橋大學既取錄信，我就發現我喺黎緊既幾個月，基本上唔需要再讀書，只要喺六月既A Level 考到佢要既Grade（A*AA），同埋考埋個IELTS，拎到7.5 分以上，我就正式成為劍橋仔。
講真，原來多年黎既目標實現之後，個人真係會有啲迷失。我開始唔知要為咩奮鬥，我熱血既心，就好似英國嗰年既天氣咁：前所未有咁涷。2010年既12月係英國有記錄以來最涷既12月，落左好多日雪，啲雪將成個草地舖成純白色，好似棉花糖咁軟綿綿，積雪有成5-6 cm 咁厚（我知5-6 cm 對於某啲地方例如加拿大黎講無乜野，但對於英國黎講就已經好大雪。）
其實我12月返澳門既時候都有一段小插曲：話說倫敦12月10號就開始落大雪，雪大到倫敦既希斯路機場都受到影響。12月18日開始機場因為積雪太大定天氣問題開始停止升降，最後大批旅客滯留左喺機楊，有啲足足要喺機場捷等三日先可以上到機。而我離開英國既日期就岩岩好係12月18日，所以我一路坐火車去倫敦既時候都一路擔心緊會唔會無得飛，如果無得飛既話我就有可能要喺機場一個人呆坐幾日先有得返屋企，諗起都驚。好彩我坐嗰班機無被取消到，所以我都好順利咁返到澳門。
1月返到去英國，積雪都仲未清哂，於是我地一班?仔夜晚Prep time 完就走出去砌雪人，打雪戰。無左考試既壓力，個人真係輕鬆哂，我開始諗下我有啲咩係想喺呢幾個月做既，因為我知道入左劍橋之後一定忙到死左，於是我决定要自己Take 半年Gap Year 。我指既Gap Year 唔係唔返學，而係放個Focus 喺第二到。咁，我到底要做咩呢？
我决定左，要喺英國學琴同考車。
雪！厚厚既雪！
第一樣想做既野，學琴。點解？話說我由F3開始，突然好想學鋼琴，於是就走左去學鋼琴。鋼琴真係好難，我完全唔明點樣可以同一時間睇兩隻手既譜，又用埋隻腳踩pedal。我真係無咩天分。我係F5 離開澳門之前既暑假好勉強咁考到個五級試，之後就無再學琴。其實我一直都好想學返琴，但黎到英國之後一直都無時間學，於是到左F7 成年幾無彈過，我决定學返琴。
我讀既私校就好似即溶咖啡咁，四合一。男校，女校，小學同埋音樂學校。而我喺之前係從未踏足過音樂學校既。决定左要上堂之後，我就去同Mrs Briers 講，想去音樂學校學鋼琴，佢就幫我安排。第一堂鋼琴安排左喺之後嗰個星期三放學之後5點，要去音樂學校既R5 Room。音樂學校同我想像既差唔多，環境好靚，被唔同樂器既聲音圍繞住既我開始喺呢個迷宮到搵呢間R5 房。搵左成十分鐘，喺同一條走廊行左幾次，終於比我搵到R5啦，已經遲左五分鐘，於是我就推門入去。
入面坐住一個中年女人，佢叫Clare，佢滿面笑容咁問我：「Hi，are you Rico?」
「Yes，I am.」
就係咁，我就開始左我喺英國既鋼琴堂。可能因為我唔洗考咩試，所以好Relax。我想學Blues，所以 Clare 就比左本 Blues 既琴書我。問題就黎啦，我同佢講我考左五級，所以佢就比左本六級程度既書我。但，我真係好彩加幸運先考到Grade 5, 仲要基礎極差，連拍子都數唔掂。所以一黎就彈六級Blues，真係有啲跟唔上。
學琴就當然要練琴啦，要練琴既話，宿舍入面既TV Room 入面都有一座古董琴，長期介乎喺走音與唔走音之間。而會彈呢座琴既有兩種人：一種係「李雲迪」，可以將呢座琴彈到出神入化，感覺要開Concert咁，例如德國仔Constantine。而另一種人就係「唔理人的」，佢地唔會考慮隔離有無人，一坐埋去就亂咁彈，佢地「彈琴」其實係攻擊既一種，好似「功夫」入面既六指琴魔咁，下下攞人命，難聽得要死。最慘就係佢地往往會係roll call 既時候 Dr Walker未黎嗰陣坐喺個琴前面，好唔知醜咁當住全部人開始「彈」。OMG。
而我，既唔係李雲迪，又無幾吋厚既臉皮，所以根本唔會喺TV Room 嗰到練琴。於是，我就只可以走去音樂學校到借房練，但由宿舍行去音樂學校足足要行成十分鐘既路程，對於一個返學只需「落樓行0分鐘」既人，簡直就好似叫個老人家去行山咁痛苦。所以，喺學校剩低既五個月，我練琴既數字係一隻手數得哂。結果，我最後好似只係學左一首歌，仲要彈得好鬼差。
Complete Failure。
咁學車呢？我既好同學阿Kim：我地學校既愛因斯坦（佢都入左劍橋，同我讀同一科，最後我地做多四年同學），介紹左佢學緊車既師傅比我，一個中年肥佬，典型英國白人，David Lundy，高高大大，體形係我既兩倍，講野好大聲，笑得好大聲，同哈利波特裹面既麻瓜Uncle Vernon 威農姨丈差唔多樣。每次上堂佢都會揸架車黎我宿舍門口接我，之後帶我去一個無乜車既地方開始俾我揸。喺英國學車，一學就可以出街揸，連筆試唔唔洗考住就可以揸車。我學車既第一堂，天氣好「英國」，落住毛毛細雨，陰陰天咁，好憂鬱，我既興奮又緊張，隻手猛咁出汗。呢個揸車既景象，我細細個開始成日發夢都會發到，夢裹面我喺車到等我嗲哋，等等下唔知咩事發生我就要揸走架車，每次都係咁，但每次都無好既結果。。。
好彩第一次揸車都平安無事。
原來揸棍波車係咁難嫁，以前打機揸車轉波噤個制就得，但揸真車嗰陣轉波要踩嗰個Clutch，又要放油。開車嗰時仲難，要放Break，再踩少少油，同時慢慢放Clutch （每個教車師傅教既都唔同，有啲會講Magic Point，有啲叫你唔好俾油，但David 就叫我踩少少油。）Clutch 放得少架車又唔去，放得快架車就會Stall 死火，對一個新手黎講真係好鬼難。我第一堂起馬Stall 左架車十次，好彩條路一架車都無。其實第一堂學既都好簡單，直線行車，加速到20 英里，轉左，停車。就係咁重覆呢幾個Steps一個鐘，似玩多過似揸車，不過我又覺得好好玩，係路上面揸車既感覺真係好特別。
我希望喺七月返澳門之前考到車，所以一個星期會學兩堂，希望趕得到考得切。如果考得切既，我就可以暑假返澳門揸車啦！
David Lundy Driving School. 揸既係 Ford 1.4 細車。
待續。。。
P.S. 其實點解要考棍波車？第一，英國唔同澳門，澳門大部分車都係自動波（我都係揸緊自動波），但英國自動波車唔夠30%，因為佢地成日要出公路，所以棍波好啲，無咁食油（好似係，除非唔係。）第二，學沙田友話齋：「學棍波既先係真男人！」