【我在劍橋留學的日子（十六）】
－一百個唔想溫習既理由
18th February 2016 / by Rico Ho
中學既最後幾個月真係玩到好開心。每個星期學二次車，成班同學Prep time 唔做功課打機，星期三下午去踢波或者打波，到左四，五月嗰時個天有時八點幾先開始天黑，我地仲會八點幾Roll Call 完出草地踢波，踢到個天黑哂乜都睇唔到先返宿舍沖涼訓覺，簡直係夢寐以求既生活。十八年黎最開心既日子。
住宿舍有好有唔好，唔好既係會無乜自由，無乜私穩。佢地（包括我）成日都門都唔敲就衝入人地房，即使做左Year 13 有自己間房都無咩分別。但好既地方就係住宿舍係唔會悶，因為一班?仔一齊就總會搵到野做。有時我地會落Games Room 打Table Tennis，或者玩足球機，或者打PS3，或者玩英式桌球。（依家諗返其實我地個Games Room 都幾多野玩。）再唔係就一齊整公仔麵食，加隻蛋，幾個圍埋吹水，咁就一晚，真係唔會悶。
過時過節我地都會一齊過。一啲鬼佬唔會慶祝既節日，例如中秋節，我地一班?仔就會一齊慶祝，走去草地上面食喺香港拎返黎既月餅，坐草地睇月光，玩無聊野。所以一齊過既節日都唔會有思鄉既感覺，因為玩得好開心。至於聖誕節，學校會有一個聖誕大餐晚餐Christmas Dinner for Boarders，只係for 我地呢啲住宿舍既。對於聖誕大餐，我最印象深刻既就係嗰啲好難食既Chirstmas Pudding，同埋嗰啲Christmas Crackers－一個節日上俾小朋友玩既玩具，要兩個人一人拎住一邊，用力一扯，就會「Pop」一聲爆開，裹面會有啲小禮物同啲名句。仲有我地最後一齊影既大合照。係宿舍住既兩年係我過得最有氣氛既兩年聖誕節。
至於農曆新年，我地當然係無假放啦。但有一年唔知係好彩定唔好彩，農曆新年撞正Half Term放假（每個Term 中間放既一個星期假），於是我地就要去Home Stay 到住。結果我地無一齊慶祝，我就好Lonely 咁樣過左一個新年，我嗰時候意識到，如果我無住宿舍有咁大班朋友既話，我應該會幾Home Sick。我應該會好似一個獨居老人咁，日日摺係房唔出街。
中學最後既幾個月，我地都唔知上到大學之後會發生咩事，可能會有啲同學會少見面左，可能有啲會以後都無再見，於是我地都會有事無事都一齊Hea，例如我會成日得閒就走落沙田友間房到「夾Band」，嚴格啲黎講係聽佢彈吉他，同喺到用噪音攻擊佢（即係唱歌。）
識我既人都可能會知道，我好中意唱歌，所以我成日會喺自己間房到開Concert，開住YouTube 播住陳奕迅既「浮誇」，就突然地高歌，有時仲會唱到比住我樓下既Ryan哥鬧。
但喺沙田友間房就唔同啦，有佢美妙吉他聲既加成，成件事就變得好聽左。佢都好樂意同我夾Band（應該係），於是我地就决定，要喺離開中學之前夾一首歌，拍條片，當係我地既回憶。我地揀左梁静茹既「情歌」，其實都唔知點解，可能因為好聽，可能純粹因為喺YouTube見到。我得閒無野做既時候就會去搵沙田友夾歌，我地練左好耐，但我音樂天資有限，所以最尾都未練好，無左回事。但就係因為咁，我開始跟佢學吉他，開頭只係玩玩下，彈兩下，掃兩下Chord，之後就慢慢開始認真學，但嗰啲都已經係大學既事啦。
我開始左學車無幾耐，沙田友都同我一齊學車，我地仲約埋一齊考筆試。考筆試嗰日係星期五黎，因為Loughborough 太細無考場，所以我地要「出城」去 Nottingham考，於是我地就向宿舍監大人請假，話要去考筆試。英國考車既筆試好簡單，你只要買一本佢出既書，裹面就會有哂可以出既選擇題，大約有1000題左右，你只要溫返呢1000題就可以啦。考試喺係朝早10點幾，所以我地考完出黎都只係11點。難得可以喺星期五離開我地既小鎮，黎到Nottingham，我同沙田友都决定唔返學校住，喺Nottingham周圍行下，再去睇戲。於是，我地就行左幾個鐘街，再走左去睇戲，嗰套戲叫咩名我已經唔記得左，只係記得係一套差到不能再差既戲，係我人生睇到最垃圾既片，想sell 「奇幻」，但就只得「奇怪」，好似70，80 年代既科幻片咁。不過唔緊要，逃學既時候做乜都有趣既。諗諗下，其實都幾似「純愛校園劇」既劇情，只係兩個主角都係男仔（HEHE？）。當然，戲情到最後都會比老師發展逃學，最尾鬧兩個主角一獲甘既，呢樣都唔例外，我地一返到學校舍監大人就黎搵我地，問我地下就去左邊，我地最後都俾佢地鬧左一餐，好彩無罰我地。
因為我想暑假返澳門可以渣車（拎到英國車牌可以喺澳門套牌。）所以我就嘗試喺未學哂車既清況下考車。我個人覺得英國考車難過喺澳門考好多。喺澳門考，有指定路線，記熟條路就無問題；但喺英國考，無指定路線，又要上高速公路，又要揸到60, 70英里（80-90 公里），最難既係有一Part，考官會叫你自己睇路牌去一個地方（例如Ely），你就要一邊渣一邊搵路，真係幾難。
考車嗰日，David 朝早8點揸左架車黎School House，車我去離Town 中心大約10 分鐘車程既考車中心。泊好架車喺停車場後我地就入左去隔離既Office，入面有4個人，2個學生2個教車既。嗰兩個學生睇落同我差唔多大，好似好緊張咁。David 同嗰兩個同行打招呼，跟住就開始閒聊家常（英國人既絕技，同咩人都可以吹水），我就坐喺到發呆。等左一陣，考官就出黎，我就跟住佢行去架車到。David 對我笑一笑，比左個手指公我，wish me luck。考車之前考官會試下你既視力，然後問你一兩題車保養既問題，然後先會開始。正式上到車後，考官叫我喺停車場做Bay Parking，即係停車場泊車，呢啲技術野我練左好多次，當然無問題啦。完成左Bay Parking 之後我地就出街，一路我見佢都無點講野，笑都唔笑下，搞到我好緊張。我揸左10分鐘到，黎到一個 roundabout 迴旋處，當我準備轉線既時候，考官突然大叫：「What are you doing? You can’t change lane here ! 」。原來我係唔可以喺Roundabout 轉線，我完全唔知，睇黎呢啲就係準備不足既後果。最後結果唔洗講：考唔到。就係因為呢件事，我俾啲朋友笑左好耐：考到Cambridge，但考唔到車。
就係咁樣，我中學生涯既最後幾個月就喺踢波，打機，彈吉他中渡過。六月既考試月，我地都收拾好心情迎接最最後一次既A-Level 考試。可能因為呢半年黎大家都玩得太忘形，所以都考得唔係咁好。雖然無預期考得咁好，但每個人都夠分入到要入既大學：球王，拔萃仔，沙田友，機神Ronnie 同Haibo 都入都Imperial College，而我，Lincoln 同神人Kim 就入到劍橋。至於James，就去左Newcastle，大家都各奔前程，各散東西。
8月26日，A-Level 成績出爐，我拎到4個A* 2 個A ，加埋8 分IELTS，正式入讀劍橋大學，成為劍橋學生。四年既大家生涯終於開始。
待續。。。