上回講到我去到劍橋既第一晚，一攤上床唔夠一秒就訓著左。第二朝起身，我就要開始跟住Fresher’s week 既行程去參加活動。我記得喺新聞睇過，劍橋既迎新活動都玩到好顛，搞到我鬼死咁期待，但希望愈大，失望愈大。啲活動來來去去唔係聽講座，就係圍圈傾計，最叻就已經係叫我地企喺個世界地圖上面自己既家鄉扮國旗，結果除左我之外就無亞洲人。說好的O-Camp game 呢？一喺就係啲新聞吹得太誇張，一係就係我呢間College 特別悶。總之，Fresher’s week 入面最精彩既活動就係我地既College parents （「組爸媽」：Second year 既學生可以做 college parents，喺fresher’s week 帶住自己既「仔女」周圍去，好似Group leader 咁。）帶左我地去pub 飲野，傾計，我可以認識下college 裏面唔同既人。嗰晚好似係我黎到劍橋既第三晚，晚上七點我地喺college bar 集合，一行十幾人就開始行去附近既 Sir Issac Newton Pub（邊有人會用牛頓黎做酒吧既名嫁？）嗰晚其實幾好玩，嗰個都講下自己既故事咁，有一個女仔係喺MIT transfer 過黎做一年交換生既，佢同我講左好多 MIT 同劍橋既分別，佢話MIT 既人係唔訓覺嫁，晚晚都做野做天光（點生存呀？）搞到我都好想去MIT 見識見識。
Sir Issac Newton Pub, 唔知同Newton 有咩關係呢？
其實喺Fresher’s week 入面同同學傾計，來來去去都係嗰幾句。讀咩科，點解讀呢科，想學啲咩，中意啲咩，總之就係subject-related 既，都真係幾 geeky「怪胎」。所以有好多人都話劍橋學生唔識同人溝通，其實我覺得係外人唔識用「劍橋」嗰一套同我地傾計啫。Fresher’s wekk 入面對我最大既得著，我諗都算係令我明白劍橋學生唔係個個都係天才，無三頭六臂，無兩個腦，唔會隨身拎住技白板筆喺玻璃上寫公式（睇得「伽利略」太多？）其實好多人都同我一樣，都係人一個。
有人話：喺Fresher’s week 識到既人，有一半你會喺一個月內就唔記得左佢叫咩名。我覺得佢講得唔岩，我唔洗一個月就唔記得哂我喺Fresher’s Week 識既人叫咩名。原因唔係因為我無記性，而係一開學就有十萬樣野做，只係趕進度就已經令我透唔到氣咁濟，仲邊有時間Social？不過其實Fresher’s week 都係可以識到好多人既，可能因為我比較「摺」，所以最後咩人都識唔到。
College 既 bar，好多人都會一班人坐喺到吹水加做野，尤其係我地Year 個班讀Computer Science 電腦科學既，當自己屋企咁
幸好，我有Lincoln（hehe?)。Lincoln 係喺Loughborough 裏面另一個入到劍橋既同學。佢入既College 既 Fitzwilliam College, 喺Churchill College 既隔離，由Churchill 行兩分鐘就到。其實都好好彩，劍橋有成三十一個學院，而Churchill 由於喺市區外面既關係，就只有Fitzwilliam 一間 College 喺隔離，其實二十九間都鬼死咁遠。 如果無左Lincoln，我相信我住College 既呢三年都應該會悶死。
開學之前，我同 Lincoln 决定左要去買架單車。因為我地嗰到返學校足足要行成九個字，坐巴士既話又貴又唔準時，於是我地都跟返傳統，買架單車代步，做個「真。劍橋仔」。但我地又唔知邊到買單車好，於是聰明（？）既我地就喺市中心用Google search 附近既單車店，最後比我地搵到一間叫「Cam Cycle」既小店。入面放滿左各式各樣既單車，有普通既薯仔單車，有條呔厚過厚切西多既行山單車，仲有「破風」流線型公路單車。而我睇中既，居然係一架Lady Bike。所謂Lady Bike，當然係比女士們踩既，但點解佢會設計比女士們踩？因為架車車身低，車頭大，唔洗烏低身成個車手咁踩，女士踩既時候都不失儀態，最盞鬼既係車前面有個藤籃比你放野，方便女士們去買餸。
Cam cycle，細細既店面同笑容滿面既老細。
My fair lady! 正！
自問細細個就睇Sky哥哥飛車，去街舖打「灣岸 2」，用住架Nissan 既 Fairlady 挑盡無數人，正路應該會揀架「破風」嫁嘛？點解我會揀呢架咁唔型既「Fair lady」（美麗的Lady Bike） 呢？我唔知，我只係知道我第一眼見到佢白色既車身就比佢迷住左，唔通呢啲就叫做一見鐘情？總之，我俾低左350 鎊，頭也不回就拎走左 my fair lady。而Lincoln 比較踏實，揀左一架普通既灰色單車。
出到「Cam cycle」，問題就黎啦。Cam cycle 位於Mill Road，係 Cambridge既China Town，有好多中國，印度同唔同國家既商店，人流好大。 而條馬路係兩條線雙向行車，十分窄，單車同車根本唔可以平排行。而我地就面臨一個兩難既處境：行人路又行唔到，馬路又好多車。於是，我地唯有硬住頭皮，喺車流好大條路又窄既Mill Road 路踩單車。幾年無踩過單車既我，左搖右晃咁樣踩住架「Fair Lady」，架車就S字咁前進，連直路都唔係好踩到。而緊隨我其後既Lincoln，其實唔係好識踩單車，所以佢比我踩得更差，好似隨時都會喺架車上面跌落黎咁。而馬路上面既車就不斷喺我地隔離飛過，同我地既距離唔夠10cm，每一架飛過既車都會令我個心離一下，踩完成條Mill Road 我好似短左幾年命咁。
最後我地好好彩咁無穿無爛咁踩到返College，而呢架車就好似Lincoln 咁，成為左我既兄弟，陪我挨過最辛苦既Year 1。
待續。。。