根據劍橋既傳統，開學既第一日係星期四。我諗其實應該無咩人知道點解，就好似好多其他劍橋既傳統一樣，「不要問，只要信。」
期待已久既開學日黎得如此既快，天真既我到開學嗰日都仲未知道，呢個係一個惡夢既開始。
開學既第一日，第一個Lecture 係9點鐘上既 Mathematics B，所以住喺深山既我，即使有左「Fair Lady 號」單車既加成，但都要早20分鐘出門口。我8點20分就起左身，梳洗一下，食個包做早餐，換件衫，拎好書包就出門口去拎我既戰車。我既愛驅泊左喺Churchill College 出面既一個單車場，裹面可以容納到大約100 架單車。我去到既時候大約見到有5,6 個人喺到拎緊單車，大家都一臉倦容，可能琴晚玩到好夜，睇黎得我一個會摺到開學之前都唔去玩。坐上單車，踩開腳踏，烏低個身，我就頭也不回咁離開Churchill，踏上不歸路，呀唔係，係上學既路。飛馳左唔夠兩秒，我就知道今次瀨左野。10月既劍橋係涷既，但原來如果行既時候涷既程度係一級，一踩上單車就變成左魔王級。無任何裝備既我又點打魔王？踩到一半我已經Feel 唔到我隻手既存在，加上右邊不斷有車飛過，風迎面吹向我已經紅哂既臉，我開始意識到呢條路，原來唔係我想像中咁易行。
我從未試過同咁多人一齊踩單車，因為係返學時間既關係，所以有接近十架單車同一時間由Churchill 出發往市中心。雖然大家既目標地都唔太一樣，但都係向嗰個方向行。過左橋之後我轉入一條小路，過左Trinity College 既後門之後就到達左大街，踩左15分鐘到就黎到市中心。呢到既單車仲多，人都唔少，所以唔熟手既我都踩得特別小心，慢慢踩到 New Museum Site，我就係喺呢到上數學同Material Science 堂。
周街都有得泊單車。
話說呢個New Museum Site 其實已經成為左歷史，喺我讀劍橋既第三年開始重建，依家可能已經起好，但好多我當時上既堂既課堂，做過實驗既Lab，食過野既Cafe，都已經唔再存在。我諗有保留到既就應該係一啲有歷史意義既地方，例如JJ Thomson 發現電子 electron，Cardwick 發現中子neutron，同埋Watson同Crick 發現DNA既 Old Cavendish 實驗室。嗰到仲有一個小型博物館 Zoology Museum（Surprised？）出面放左一條成幾十米長既Finback Whale 長鬚鯨既骨化石，入面仲有好多唔同種類既化石。除左呢個Museum 之外，仲有幾個唔同既Department 喺呢到，例如：Material Science，Zoology，仲有Maths Department。
其實我都無時間欣賞New Museum Site 有幾靚，因為喺返學時間要搵到個位泊單車，同返工時間喺南灣搵位一樣，難過睇到Stephen Curry miss 三分波。 所以好多時候我都係是但搵個位放低架車，鎖住個轆就走人。入到課室，已經係9:01 分。課室係一個小型演講廳咁，有五，六排長枱，每排可以坐到20人左右。課室既前面就放左兩部投影機，Professor 就企左喺到微笑咁望住我地。每人手上（或者枱上）都有一份岩岩拎到既Notes，一份幾十頁既Lecture Notes。我隨手喺第一次排長枱到拎左一份，就行過去坐左喺尾二個行。
上堂既情況，前面嗰個係我最中意既Professor：Stuart Althorpe
我開始細望呢一份數學Notes，其實內容比我預期既簡單，都係一啲A Level 學過既數，但份量就真係多得驚人。我地居然可以用兩堂Lecture 教A Level 學左一年既內容，120 分鐘＝ 上年一年學既份量。究竟佢要教得幾快先可以講得哂？事實係我唔需要問呢個問題，Professor 喺十分鐘之後已經解答左我既問題：快到唔知佢講緊乜。喺劍橋上堂，就好似陪女人行街咁，一轉頭，佢已經唔知行左去邊。望一望個電話，就已經唔知Professor 講到去邊，跟住之後既幾十分鐘基本上都唔洗聽，因為Lost 左就好難跟返佢講咩，唯有之後自己再睇返Notes 研究研究。
50 分鐘既上堂時間（9:05 a.m.－ 9:55a.m.) 過得好快，但我既精力消耗得更快，我覺得自己上完一堂之個頭已經有啲暈。55分落堂後我地有10分鐘時間由New Museum Site 趕去Chemistry Department 上 10 點05 分既Chemistry堂。雖然兩個地方路程唔算好遠，但我都決定踩單車去，一黎快啲，二黎唔洗行返黎拎。如果你喺十點正／十一點正呢啲時間經過劍橋市中心，你一定會見過一個景象，幾十個學生，踩住幾十架單車同一時間向一個方向進發，車龍可以有成幾十米，何其壯觀。當我踩住戰車，置身於身群中，我就喺到諗，唔知其他人望住我地呢班劍橋學生會點諗呢？覺得我地係天才？覺得我地只係識讀書？可能佢地只係覺得我地好嘈，因為，我地真係好鬼嘈！
Chemistry 用到既BMS Lecture Theatre，應該係全劍橋其中一個最大既課室，甚至可以叫佢做演講廳。BMS 足足可以容納700個學生，而第一年讀Chemistry既學生有超過600人，係劍橋最大既科目之一（Physics 都有600人），600個學生同時間一齊上堂，真係似聽Talk 多過上堂。教我地既Professor 叫 Peter Wothers，寫過幾本好多人睇（應該？）既書，上年我都有拜讀過佢既「Why Chemical Reaction Happens？」，估唔到今日居然可以上到佢既堂。Dr Wothers 等到10:05，就清一清喉嚨，開始講書，本身嘈過女校既Lecture Hall 就突然靜哂，反差之大令我驚訝，靜到好似平時喺圖書館連寫字既聲音都聽到，細心啲聽，可能連隻錶跳動既聲音都聽到。
BMS Lecture Hall, 出面有得比你食野，仲有個Cafe仔。。
由BMS 中間影落去，只係影左課室既一半。
五十分鐘過去，10點50分。估唔到上左兩個鐘堂，我已經Brain Dead 左，個腦「實」哂。原來喺劍橋上堂真係同中學差咁遠，我開始明白乜咩叫做「一夜白髪」，讀多兩年我諗我就煮得出「暗燃消魂飯」啦。一放學，就收到2個E-mail。兩封都係我既 Supervisor 們 send 比我既，叫我地做功課，下星期交。點解要交功課？因為劍橋有一個好特別既制度，叫Supervision system，即係「補習堂」。每個星期每一科有一堂，教授或博士生會同我地呢啲小學雞做一對一或二既補習。而每一堂學生都要交功課，四科交四份功課，做完上堂一齊討論。四份功課啫？有幾多？少年你太天真啦，一份功課既份量係足夠我做兩日嫁，所以每星期四份功課做到天荒地老都做唔哂。
後尾我聽返同學講，如果要數劍橋讀得最辛苦，最多野做既學生，第一班會係Medicine 二年級生，第二班就應該係我地呢班讀Natural Science 既一年級生。原來，我一入學，就打大佬。
待續。。。
劍橋小知識：震驚全球100億人的大學學期時間表！
劍橋大學既學期比其他英國既大學（同埋世界上大部分其他大學）短好多，一年總共有三個學期：Michealmas Term，Lent Term and Easter Term。頭兩個學期大約有8個星期（唔夠兩個月）既課堂，最後一個學期只有四個星期既堂，加埋20 個星期。所以劍橋學生既 Christmas 假有6 個星期，Easter 假有4 個星期，而暑假則有4個月。加埋返學時間唔夠半年，有多過一半既時間都係放緊假！（這些機會。。。）