有個智者（即係我）話過：「得唔到既愛情就好似做唔到既數咁，解決既方法只有一個：唔做佢，做其他野。一係你就會做做下其他野諗到點做；一係，你就會完全唔記得左呢條數。」但當你已經唔記得左呢件事既時候，呢條數又再出現，你又會唔會心思思想再計多次呢？
其實上一次喺Churchill見到阿嵐，我就知道我對呢個女仔係無防禦力既。所以，喺Boat Party 撞返佢之後，我就開始同佢有聯絡。得閒我都會同佢傾下Whatsapp，吹下水。我其實知道我唔應該咁做，始終我都已經有女朋友。但，阿嵐對於我黎講喺一個好重要既人，無佢我都唔會入到劍橋（當然我唔會話佢知啦，咁樣衰），所以即使做唔到情人，總可以做朋友掛？
喺Imperial College 讀書既女仔，同中意打機既女仔一樣：罕有，搶手。話哂都係一堆麻甩中既清泉，再平凡既女仔都變成仙氣女神。所以，喺IC讀左一個Term仍然單身既阿嵐，係十分忙既：忙住應酬，拒絕（？）男仔。我問過佢：「點解你唔收兵？」
「我唔識收兵嫁。」（嘩，虛偽到呢。）
不過其實我都覺佢係唔會收兵既，咁男仔頭既性格。應該係，除非唔係。
－－－－－－－－－－－－
2011 年既冬天比2010 年既暖少少，至少無落雪落到機場都閂埋，但到左十二月頭，英國都開始落雪。十二月，我喺劍橋既第一個Term 終於完左。於是我决定喺返澳門放假之前落London 玩兩日，話哂依家有個地方可以Stay ：沙田友間房既地下。我仲可以約下阿嵐出黎食飯。而因為我地既Term 短過佢地兩個星期既關係，所以我落去既時候佢地係仲未完Term 既。咁仲好，可以扮下IC學生入去上下佢地啲堂，睇下同劍橋既有咩唔同。但離開劍橋之前，有一個好嚴重既問題：執房。
由於放假既時候我地既宿舍房會租出去比黎開學術會議Conference 既人住，所以喺離開之前我地要將成間房屬於自己既野執好，然後搬上二樓既Truck Room。
我用左足足四個大喼，兩個大行山袋，仲要加多幾個細既箱先裝得哂啲野。一路執，我就一路咒罵諗呢條縮數出黎既人。學生唔喺到住既時候租出去搵錢咁既計都比佢諗到，搞到我要次次放假都搬餐死。
不過一諗到我終於可以抖下，唔洗再比無限重生既功課同Experiment Report Chur 死，唔好話叫我執喼，成個喼食落肚都得呀！因為，黎緊既六個星期聖誕節假期，我乜都唔洗做，可以由朝訓到晚，人生何求呀！
我執好哂野之後，就即刻衝落倫敦，準備返澳門。拖住個喼喺雪地上行下行下，我就再一次黎到Imperial College，對上一次黎已經係上年Interview既時候，仲記得當時仲未知自己入唔入到劍橋，「忐忑不安」同「未知」就係我對Imperial College 既感覺。但係今次黎到，呢間百年大學又比到我另一種感覺，一種熟悉又陌生既感覺。唔知如果我上年考唔到劍橋黎左呢到讀書，我既人生又會變成點呢？
Imperial College 出面既大街。
喺倫敦呢兩日我都係住喺沙田友間宿舍房間，呢個叫Garden Hall 既宿舍，一間幾有School House 味道既宿舍。School House 係咩味道？殘舊既味道，一種古舊建築物獨有既「老人味」。沙田友間房同我喺劍橋個間差唔多大，但係喺二人房間，佢同一個鬼仔Share。我去到既時候已經喺十點幾，所以無點認真睇過佢間房就訓左。
第二日，我就跟左佢去上堂。第一次上其他大學既堂，我覺得內容其實差唔多，唔同既地方係佢地既學生上堂既時候會問Lecturer 問題，仲要手都唔舉，就咁坐喺個位到問。仲有既係男女比例嚴重失衡，成間Hall 百幾人得幾個女仔，真係聞者傷心，聽者流淚。
到左夜晚，我就約左阿嵐出黎食飯。我地約左晚上六點喺IC 正門口等。佢著左一件深紅色大褸，黑色頸巾，雪白既膚色加上童顏既外表，令到佢成個小紅帽咁。雖然之前都會傾下Whatsapp，但呢一次都係第一次面對面傾計，所以我一見到佢就突然緊張起黎，都唔知緊張啲咩。
我地既目的地係一間叫DOZO 既日本餐廳。其實呢間餐廳真係唔錯，最出名食手卷，又夠芝士味，又唔怕太濃味。有好味既野食，阿嵐呢個「食貨」當然心情好好啦，所以成餐飯我地都傾得幾開心。我無諗過我地可以咁自然咁一齊食飯，傾下佢上堂既野，呻下我喺劍橋既不人道生活。我望住眼前呢個幾年前一直都想見到既人，心裹總有一個唔係好踏實既感覺。
日本餐廳DOZO，自從嗰次之後每次去South Kensington 都會去食。
食飽飽，就返屋企（I mean 沙田友間房）。喺昏暗又冰冷既街道上，口中噴出霧氣，兩個人喺雪地上留下兩條長長既腳印路。行行下，突然落起雪黎，望住飄下飄下既雪同埋昏暗泛黃既街景，我突然覺得好似拍緊戲咁，加埋啲音樂就Perfect啦。可惜，阿嵐唔適合拍愛情劇，佢適合拍卡通片。因為當我正享受緊呢一刻既美麗既時候，佢就開始搵雪「咪」我，仲笑到成個傻仔咁，破壞哂啲氣氛。我當然唔執輸，馬上執起地上既雪「咪」返佢轉頭。兩個人一路行一路「咪」，不知不覺就返到佢宿舍。
英國美麗既雪景。
我上左去佢宿舍坐左一陣，參觀下佢間房。佢都係住二人房，但個 flatmate 仲未返。女仔既房真係比男仔既房亂十倍，唔單止枱上，櫃上，連地下都放滿野。阿嵐個 flatmate 嗰個 area 仲誇張，好似比龍卷風卷左幾次咁。坐左一陣，我就返去沙田友個邊，訓覺覺。第二日就坐飛機返左澳門。
嗰一次，係我Year 1 最後一次見阿嵐。
過左無幾耐，佢就比人追走左。
再見，我既沈佳宜。再見，我的青春。或者下一次我地再相遇既時候，會喺一個岩既時間，一個岩既地點，同埋兩個岩既人。或者？或者。
待續。。。