【我在劍橋留學的日子（三）】
－世上最遠的距離
12th November 2015 / by Rico Ho
F3暑假之後，我既沈佳宜就係我既世界消失左，好似從來都無出現過。我好記得阿嵐飛去英國個一日係八月二十六號，我個晚鼓起勇氣打左個電話俾佢，聽筒既對面接聽電話既係一把男聲：「阿嵐佢去左英國啦。你搵佢有事？」「哦無野啦，唔該。」估唔到我咁白痴，明知佢二十六號走居然會個晚打俾佢，佢個時一定係香港機場啦！或者其實我根本唔預左佢會聽我電話，因為佢由七月開始就已經開始避我，我已經好耐無聽過佢把聲，我打去既目的可能只係想「再見我的初戀」啫。
我以為我會好消沈，為左呢件事唔開心好耐。畢竟，英國同澳門相差八千英里，有八小時時差，比好學生同壞學生既距離更遠。但我當時有一種感覺，我覺得我地既故事仲未完，我地某一日會係英國重聚，然後順理成章咁一齊。（我唯一估岩左既係我地既故事係仲未完既。）所以我無好消極，反而好積極咁樣諗等阿嵐下年暑假係英國返黎要送個驚喜俾佢，於是，我開始摺星星。（我知，我真係好九十年代！）
係嗰個iPhone ，Whatsapp 同 Skype 都未普及既年代，要同異地朋友聯絡就只可以靠MSN，或者email。英國同澳門八個鐘既時差令我愈來愈夜訓，每晚既指定動作都係坐係電腦面前望住個MSN摺星星，但阿嵐既MSN永遠都係離線，而我摺既星星就愈來愈多。當然，我都開始準備去英國讀書既野，諗住F5畢業後就可以去英國讀 A level（當年既英文部係可以選擇Form 5 畢業。）當我同爹哋媽咪講我想去英國，仲要考劍橋既時候，佢地既反應係又好笑又欣慰，好笑既係自己個仔會咁不自量力，而欣慰既係我肯認真讀書。我諗我當時都無諗過呢個「夢想」最終居然真係會實現到。
我同英國中學既e-mail 往來
既然要入劍橋，當然要小心揀一間好既英國中學黎讀啦。當我開始做 research 調查英國邊間中學讀A level 比較好既時候，我發現澳門去外國既大多都會選擇美國，因為透過Community College 入名校比較易，所以好多澳門既升學中心留英既選擇真係好少，而且唔係太好。於是我就自己上網搵英國私校排行榜，揀左啲排名高，學費又唔太貴既中學，然後膽粗粗自己send email 俾啲中學問佢可唔可以收我，大大話話用我啲唔知寫緊咩既英文send 左俾十幾間中學，神奇既係佢地居然睇得明！但佢地就回覆我叫我搵agent 同佢地傾，我就係唔想搵agent 所以自已搞。最後我搵左學聯幫手，佢地同一般升學中心唔同，我要話佢地知我想讀邊間，佢地只會俾個地方我考試同幫我揀既學校溝通，正合我意！因為報考學校需要既關係，我仲係F4嗰年暑假考左IELTS。一切都好似準備就緒，直至F4嗰一年既暑假，阿嵐喺英國返左澳門放暑假。。。
小插曲：因為好多升學講座都會喺香港舉行，有一次有一間英國好出名既中學 Concord College 喺香港舉行招生講座，仲即場報名同面試，我當時個agent 喺講座舉行嗰一日先同我講，叫我趕去，漁翁撒網既我當然唔會執輸啦。我飛快趕去港澳碼頭，買完飛就即刻衝左上船。「我唔記得左印赴港申報表呀！」（2009年之前澳門人去香港係要先係港澳碼頭印赴港申報表，先可以入香港境。)當我發現我又一次低能左之後我走去同個船員講。「咁樣你無得入香港境嫁。一陣你落船後要上入境署簽張同意書同意被遣返，同事再帶你落黎坐回程船返去啦。」「遣返？！」最後當然香港去唔成，講座聽唔成，仲要坐係入境署等左半個鐘，簽左一張拒予入境通知書，再落返去坐回程船返澳門。嗰一次真係?到無朋友。
待績。。。