第一次坐長途機，就要坐十二個鐘，真係好大獲。英航既經濟倉張凳仲細過澳門大會堂啲位，隻手又唔知放邊到好，飛機引擎又嘈，一個字講哂：陰公。長達十二個鐘個既陰公。好彩我中學時期訓練有素，練成神功可以企係到都訓得著，於是我係呢個環境下一訓就訓左八個鐘。係飛機食完夜餐就訓著左，訓醒既時候就已經準備食早餐啦。我拎住張入境申請表，一路填一路擔心入境既時候唔知會俾個職員問我咩問題。因為學聯個姐姐同我講過，啲英國入境大廳職員會問我好多問題，要諗清楚先答。我有啲驚如果唔識答既話會俾即刻遣返（都唔係未試過俾人遣返。）

飛機準備降落既時候，我望到出面既夜景（由香港去倫敦既機多數都係凌晨五，六點降落。）倫敦既夜景同香港差好遠，少好多燈，感覺安靜啲。一排排黃色既街燈映照住陌生而安詳既街道，一個我從未踏足既國家。而我，未來六年將會係呢個陌生既國家生活六年，至少六年。諗到呢到我個心就開始有啲忐忑不安。

帶住興奮又緊張既心情，我成功咁過左入境大堂（入境過程比我想象中容易，英國人都無我想像中咁可怕。）我手拎住兩個大喼，背脊孭住個行山袋，仲有一個電腦袋，好似搬左成間房黎英國咁。我緩慢咁行出Arrival，出面就有個學校派既的士司機等緊我，佢手上拎住個白板，上面用啲好核突既字寫住「Chon Pan Ho」。我向佢打招呼，表示我就係Chon Pan Ho。佢好熱情咁幫我拎左一個喼，一個電腦袋。一路行去佢架的士佢一路同我傾計。個一刻我懷疑我係咪去左意大利或者法國，因為佢講既英文我一句都聽唔明，所以我只係識得「Yes，yes ，yes。」好似個傻仔咁。

的士無幾耐就開出左公路。英國既公路同香港（澳門都無公路。）既無咩分別，唔同既係大啲，同埋啲路牌係用英文既。上到的士無幾耐，我又訓著左。呢一覺一訓就訓左兩個鐘。訓到佢要叫醒我，然後同我講：「Here we are, Loughborough Grammar School！」我望出車窗，見到路既左右都係好高既樹，四周有幾個著住灰色西裝既小朋友（我地學校既校服係西裝，中一至中五係灰色西裝藍色恤衫，中六至中七係黑色西裝白色恤衫。），而右手邊就有間啡色兩層高既小屋，出面有一個笑容滿面既英國女人向我地招手。