「Hello。我叫Rico。」
「Rico？咁咪即係同我地同房？」眼鏡男問。
「同房？唔係一人一間房咩？」我心諗。
「咁跟我地上黎啦。」另一個大隻啲既男仔話。
佢地帶左我入一間棗紅色既兩層大屋，一入去就聞到一種舊木器同油漆混合一齊既味，一聞就知呢間宿舍應該舊到放得入博物館。行過條走廊就見到一條兩層樓高既哈利波特spiral stairs (盤旋樓梯），OMG我要拎住兩個喼，加埋四十幾公斤野搬上去，依家諗起都驚。但個時要面，同個幾個男仔唔熟，於是唯有硬住頭皮，左手一件，右手一件，一口氣拎住兩個喼衝左上樓梯，再行落去拎埋個行山袋同電腦袋上去。上到去真係feel 到隻手會痛返三，五，七年呀。
兩層樓高既哈利波特spiral stairs, 又窄又舊。
我地間房既白色門口上面寫住 「 Room 2 」，我用無左知覺既手推開門，一望，比我想像中好得多。間房好大，房既四角有四張床，床既隔離各自有一張電腦枱同衣櫃，而門既隔離就有三個洗手盆。雖然話係四人房，但間房就大到可以係中間空位跳 breakdance。
我個位係門既左手邊，我放低哂啲野。之後個三個男仔就自我介紹。眼鏡男叫Wilson，但我中意叫佢做拔萃仔，原因唔洗多講啦。另一個高高瘦瘦既就叫James，佢簡直就係我地School House既傳奇，但佢啲傳奇野就等遲啲再講。最後一個大隻啲既叫Kenny，但中意人地叫佢做「球王」。What a name !
我地傾左一陣計，我發現原來佢地都係今年第一年黎，只係比我早黎左二，三日。見佢地著哂校服，我就問：「今日開學禮咩？」「係呀，哎呀夠鐘啦，要出去啦。」「下！我未換衫喎！」由於我連套西裝係邊個喼都唔知，結果我就衫都無換著住件鮮紅色格仔恤衫就去左開學禮。諗返起真係後悔莫及。
其實我真係好攰，海陸空乜都坐哂，用左成二十個鐘由澳門黎到 Loughborough，點知一黎就開學禮，真係囉命。入到個禮堂，發現原來開學禮係分年級搞既，所以個hall 好細，好似只係坐得百零人咁。我地幾個有啲早到，所以就坐左係第一行。無幾耐啲人就陸續黎到，全部都係鬼仔，同埋印度人（我學校個區真係好多印度裔。）呢刻我開始覺得大獲啦，佢地個個都著哂校服，用奇怪既目光望住我，好明顯就係因為我著住個件鮮紅色格仔恤衫，今次真係想唔出名都難。當同學到齊之後，一個肥肥地滿面鬍鬚既男人就好輕快咁行入黎，佢係Dr. Walker，我地既Head of Sixth Form，類似級主任咁。佢一入黎，就指住我，跟住用超重既蘇格蘭口音講：「What a smart shirt! I like it !」OMG，點解！點解我要唔換衫就黎！搵唔到件西裝咪扮病唔黎囉！（後黎先知搞事整蠱人係蘇格蘭人既特質，好多蘇格蘭人都好中意整蠱人。）
經佢一講，全世界都望住我，有啲係到笑，我真係樣衰到想搵窿捐。之後佢講既野，我一句都無聽到，除左因為我聽唔明之外，仲因為我完全無心聽，只係想快啲離開現場。
個日只係開學禮，無堂上，於是完左之後我就九秒九衝返宿舍，希望無人認得我。我整好左張床之後就攤左上床，一訓就訓到食飯。飯堂離宿舍只有五分鐘路程，相當之近，但野食就真係難食無比。
「喂，MK仔。」一個高我一年級既香港人叫我。佢叫Nelson。
「下？」我唔明。
「聽講你好型喎，著件潮衫去開學禮。」
其實當年我個look 的確幾MK，因為貪得意染左一個金髪，仲留到好長（岩岩畢業無人理，就更係之前乜野唔做得一次過做哂佢嫁啦。）加上我開學著個件鮮紅色格仔恤衫，令我從此得了「MK仔」呢個稱號。
待續。。。
