【我在劍橋留學的日子(七)】

-男生宿舍

25th November 2015 / by Rico Ho

myroad7-01

同好多澳門人一樣,我由細到大都未試過住宿舍,估唔到第一次住宿舍就要同二十幾個男仔同住兩年(P.S. 好彩我沖涼唔係用番梘。)其實都真係有啲擔心適應唔到。不過我黎到英國無幾耐就發現我既擔心係多餘既,因為我住既係男生宿舍,讀既係男校,成班男仔一齊既娛樂唔係踢波打波就係打機,無乜是非,黑就係黑,白就係白,我地既世界好簡單。

學校生活正常到好唔正常,每日七點半就會有Year 13既學長黎逐間房逐間房叫人起身。相當求其咁係半開既門出面大嗌「Morning!」就走左去,唔知仲以為佢係到搵緊人。我地間房四個人,球王同拔萃仔就最早起身,未morning call 就已經起左身擦牙換衫準備出去食早餐,而我就會係七點半施施然咁起身慢慢梳洗。School House傳奇 James 就成日都唔起身食早餐,訓到我地食完返房仲訓緊。

mybed-01

房入面梳洗既地方。

學校既早餐成日都係一式一樣,English Breakfast 英式早餐 或者 cereal  麥片,所以我從來唔明點解啲人對全英式早餐咁嚮往,因為真係好難食,啲 becon 又鹹,beans 又淨係得蕃茄味,啲香腸燶到好似食完會生幾次癌咁,得啲mushroom 同 scrambled egg 係比較入到口。可能係因為係boarding house,所以整得特別求其。

食完早餐,返房上facebook 睇兩下就夠鐘返學上堂。我地由九點鐘開始上堂,朝早上到十二點半。食完lunch 兩點再上過,之後三點半就放學。無錯,三點半就放學,喺澳門係無可能發生既事。其實喺英國讀中學仲有好多同澳門唔同既事,等我遲啲有機會慢慢再講。

我諗岩岩黎到最唔慣既係食既野,我地宿舍五點半就食Tea,第一次聽佢地話食Tea,仲心諗你地班英國人咁識嘆既。但原來佢地所謂既Tea,唔係好高貴咁拎住隻細到無倫既杯,嘆英國紅荼吃西餅既 Afternoon tea,而係食難食到嘔既Dinner,最頂唔順既係佢地既「英式印度咖哩飯」,飯無飯味,咖哩無咖哩味。SOSAD。所以喺到讀左一年既香港師兄就俾左張中餐外賣紙我地,每當個晚既Tea太難食既時候,呢張外賣紙就係我地既救星。

食完飯之後,就係最痛苦既Prep time,Prep time 即係溫習時間。係迫你溫習既時間。偉大既舍監大人(宿舍話事人,係一個好中意將副眼鏡放上額頭頂扮太陽眼鏡既大隻體育老師。)會逐間房逐間房走入黎叫你溫習,見你溫緊習乖乖豬就醒你一個單眼笑容(OMG 嘔死)。兩個鐘既Prep time 我功課二十分鐘就做哂,淨低既時間無野做我就開始睇課外書。因為話哂我黎既目的係入劍橋讀書,當然要俾心機讀書啦。

CIMG2234

我真係有溫習嫁。拿!有圖有真相!

到左八點半 Prep Time 完左之後,我地成班boarder 就要落下面TV room 到 Roll Call 點名。所謂roll call, 就係 Duty Master 值班老師等所有人到哂之後逐個叫名,我地就要講「Yes,Sir!」。每次當Dr. Walker (第一日整蠱我嗰個蘇格蘭老師)做Duty Master 我地就唔講「Yes,Sir!」要講「Ahoi!」,好似係蘇格蘭文,但我到衣家都唔知解咩,而佢就好中意點名既時候係叫我做「Ricohehaheha。」,叫到好似唱歌咁,好似話係一套意大利電影裏面, Rico係一個大反派,而佢最中意講既對白就係「Hehaheha。」佢真係咁樣叫足我兩年,好鬼無聊。

而roll call之後我地第一時間就會衝上房。衝上房拎野去沖涼。由於呢間宿舍係歷史文物,所以佢既熱水係會用哂既,如果嗰晚既熱水用哂,你就只可以沖凍水涼,凍到你叫救命。所以次次一roll call 完成班男仔就好似白痴仔咁跑上房,跑輸嗰啲就只可以「wish you good luck tonight!」。

其實宿舍生活真係好開心,一班男仔無壓力無顧慮無是非,可惜呢兩年過得真係太快。

待續。。。

 <<【我在劍橋留學的日子(六)】- 我係MK仔?

 【我在劍橋留學的日子(八)】- 被選中的小孩>>