學校喺係一個叫Loughborough 既小鎮入面，美其名話係小鎮，不如話佢係「一條街」。因為成個鎮只係得一條街，其他地方都係住宅區。而我地既同學都係「被選中既小孩們」，因為我讀既Loughborough Grammar School 係一間私校，而只有最有錢既英國人（~ Top 10%) 有能力送自己既小朋友黎呢到讀書。（但因為我無英國／葡國護照，所以只可以忍痛揀私校。）但有趣既係，我地既同學都無嗰種不可一世既土豪，「離地」感覺，反而好友善，有英國紳士既味道。
星期六先開既Market，同埋Loughborough 最大（即係唯一）既中國超市。
踏入十月，我已經適應左係呢到既退休生活。朝早七點半起身，夜晚十一點訓覺（宿舍十一點就會熄燈，如果有人咁夠膽十一點後開燈做野被舍監大人發現結果會係慘不忍睹，將會被沒收電腦一個星期。真係諗下都想喊呀！）學校教既野都唔難，讀A level 只係要讀四科。我揀既係理科A餐Maths，Further Maths，Physics 同 Chemistry，基本上所有想讀工程或科學既同學都會咁揀，讀醫既就會放棄有趣既Further Maths，而讀寫Essay寫到抽筋既Biology。因為港澳讀既數學讀得比英國人快，所以嗰兩科數包括數學同進階數學對我同班香港同學而言都唔係咁進階，而 Chemistry 同 Physics都都唔係太難（如果聽得明佢地個啲好重口音既英文既話。）
我地係無固定課室上堂既，所以上Physics堂就去Physics個實驗室，上數學堂就去數學樓。而我最中意就係上Chemistry堂，除左因為Chemistry夠得意，夠奇怪之外仲因為Chemistry班同學好搞笑好Friendly。坐我隔離既叫Bhavik，係一個印度裔既英國人，佢教左我好多英文俚語，係我喺呢到識既第一個外國朋友。而教我地既Mr Haigh就成日問我地奇怪既問題，見我地唔識答就會露出佢既招牌Evil smile。而你係呢到真係會見到好似教育電視入面咁，老師問問題，學生舉手答問題既情況。我最中意既就係呢種互動既教學模式。可能因為大家都有參與課堂，又或者一班只係得唔夠十個人上堂，所以我係嗰到讀書兩年黎都未見過有人上堂訓覺，真係幾神奇。
受到佢地既影響，我開始都會上堂答問題，但我都係等同學唔識答無人舉手我先至會答。漸漸當有無人識答既問題Mr Haigh 都會望一望我，好似叫我解救呢班迷途小羔羊咁。我就無啦啦變成左班上既「學霸」。或者就係因為呢一份「哪來的自信」，我就做左一件依家諗返起都覺得自大既事。
左邊個間咁新咁Modern既就係學校既Chemistry 樓，我入去讀既09年岩岩起好。
每年Year 13 學校都會揀幾個Chemistry 最好既 Year 13同學（即係中七）去參加英國既Chemistry Olympiad 化學奧林匹克，考得好既就可以代表英國參加國際化學奧林匹克賽。而我地學校係呢方面都時有佳績（不過其實學校最勁既係數學隊，年年係全英頭幾名。）由於我自我澎脹得太誇張，於是我就同係化學科科長既Mr Haigh講，雖然我只係Year 12，但我想考Chemistry Olympiad，因為咁樣幫助到我去考大學。
Mr Haigh 聽完之後露出佢一貫既Evil Smile，諗左一諗，同我講叫我聽日放學留低做個Test，如果考得好，就比我代表學校參加。我聽完既興奮又緊張，返到房就即刻準備第二日既測試，睇Past paper，睇課外書，諗下呢樣諗下嗰樣，希望可以成為全校第一個Year 12 既Chemistry Olympiad學校代表。
第二日既三點半，我行到去Mr Haigh 既課室，佢坐左係自己張枱到做緊野，見到我佢就叫我坐係第一排做左張卷佢。張卷既內容我唔係記得好清楚，總之條條問題都好騎呢，問埋哂啲好似答唔到既問題。我好勉強咁係三十分鐘內做完左份野，Mr Haigh好認真咁對左十分鐘我既答案，之後同我講：「Great！I guess you are qualified ！」
嗰一刻，我覺得我係「被選中既小孩」。
