係英國讀中學，每一個學期都會有Half-Term。Half-Term 唔係澳門既 Mid-Term 中期測驗，而係放假。仲要係放一個星期假（我地學校有一個Half-Term會放成兩個星期添）。Half-Term 既時候學校係唔會開既，連School House既老師都會放假，所以學校會趕哂我地呢啲Boarder走，無家可歸既我地就要去Home Stay 到住。除左Half-Term,仲有Exeat Weekend 我地都要去呢啲Home Stay 到住，所以一年可以去成十次Home Stay 咁濟。
監護人公司會幫我地安排喺唔同寄宿家庭到住，而盡量每一次Half-Term 都唔同，希望我地感受下英國唔同家庭既文化同特色。而呢個制度有好有唔好，好既就係我可以同唔同既人傾計，感受下唔同既文化。唔好既地方就係你永遠唔會知你今次去既Home Stay 係一個咩家庭。所以，當日我坐的士去嗰個屋企既時候，我都無諗過我會被嗰個老女人趕出街。。。
第一間寄宿家庭，我住既應該係書房，好多書係間房到。
我仲記得趕我出黎嗰個係我試既第三個寄宿家庭，之前既寄宿家庭都對我好好。第一個寄宿家庭係一個黑人女人，屋企充滿非洲風情，放滿哂好多唔同既貓，狗既木像。而沖涼房係無花灑既，所以我就要被迫玩浸浴，真係好浪漫呢（定浪費？），不過佢整既野完全唔英國，絕對係好食過School House既野。第二個寄宿家庭係一個典型白人家庭，屋企有Mrs Wilson, Mr Wilson 同佢地個女 Khia，仲有三隻貓，一隻狗。但因為佢間屋得一間空房，所以我同我既同學Haibo要Share 一間房，訓上下格床。Haibo係一個北京人，典型北方人，眼細細高高大大，講英文發唔到 ”th” 音，會發成”si” 音。
由於寄宿家庭離市中心好遠，要坐成半個鐘巴士先去到，又由於我係一隻蛋黃哥既關係，所以成個Half-Term 基本上我只會出一次市中心，其餘時間我都會留係屋企。所以一日有超過十五個鐘都會喺我既上格床上面過。我最中意就係喺 Half-Term既時候上網睇啲MIT既 online lecture，因為得閒唔洗溫習，仲可以學到啲得意既Quantum Physics 同 Relativity 相對論添。
Mrs Wilson 屋企隻狗，叫ShiSha。已經好大年紀啦，成日只係訓係到，所以有陣味。
有一朝朝早訓訓下我發現我隻腳好重，想轉個身都轉唔到。我一望，原來黑貓BB訓左係我隻腳到，仲訓得好冧添。搞到我都唔好意思阻住佢，所以我只好讓半張床比佢落去食早餐。點知食完早餐上黎佢訓左上我個枕頭下面。
其實頭兩個Home Stay都好好，但我點都諗唔到第三個寄養家庭會係咁差。呢個寄宿家庭得一個五十幾六十幾既老女人 Mrs Tye，同一個十二，三歲既男仔，仲有佢個女朋友仔（係呀，十二，三歲就一齊住，個阿媽仲要無問題。）Mrs Tye 隻腳有啲事，要用拐杖行路，佢既口音係我住喺英國六年聽過最重口音，聽落似印度話，所以我基本上係聽唔明佢講咩。最大獲既係佢個仔，成日晨早流流開到個喇叭對面海都聽到咁，但我間房係佢間房隔離，所以每朝朝早都好似聽緊 Rock & Roll Concert咁，但其實我中意聽Tylor Swift，對 Linkin Park 無咩興趣呀大老。
因為我地都好遲先訓，所以朝朝咁樣鬼叫都真係幾想喊。仲有因為太夜訓，所以我地有時都唔會落去食早餐，就係因為咁Mrs Tye 就開始唔滿意我地（但佢又無同我地講過）。直到有一日，佢叫我地落去食早餐，早餐係一件芝士三明治，但係塊芝士係未解涷既，似塊石頭多啲。我見佢拎左出黎，唔想食都要食啦，好不容易哽哂件三明治之後 Haibo就落到黎食早餐。佢無我咁怕事，望到塊石頭芝士之後佢就頭也不回走返去房話唔食早餐。點知 Mrs Tye 係呢個Moment 就爆啦，佢發哂火話我地無禮貌，整好哂早餐又唔食，話我地遲起身又乜又乜，其實大概鬧乜我己經唔記得左，都聽唔明，只係記得十分鐘之後佢就同我地講叫我地執野走，唔招呼我地。
佢打左俾監護人公司，叫佢地搵人送走我地。嗰邊話咁突然要下午先叫到的士送我地去第二個寄宿家庭，但 Mrs Tye 話唔想再見到我地，所以要我地立即執野走，於是我地就要晨早拎住啲行李坐半個鐘巴士出市中心做無家可歸既流浪漢，行到下午，先再坐的士去另一個Home Stay 到。
當我上到巴士，望住出面既景色，我突然覺得呢個地方好陌生，離屋企好遠。有啲咩事無屋企人幫到手，只可以靠自己。原來，英國離澳門真係好遠。
架的士喺四點鐘黎到接我地，原來係送我地去 Mrs Tye 屋企到嗰個的士司機。佢聽左我地既經歷，就同我地講嗰日送我地去既時候見到間屋仲掛住聖誕裝飾，就己經覺得有啲奇怪（個陣時已經二月），不過佢話：「All experience is a good experience。」呢句說話我記到依家，都成為左我既座右銘。
